ފޯޅަވަހީގެ މައްސަލާގައި އިދިކޮޅު ކޯލިޝަނުން ނެރެފައިވާ ބަޔާނަކަށް ރައްދުދީ ދިވެހި ސަރުކާރުން މިރޭ ނެރުނު ބަޔާނުގައި ބުނެފައިވަނީ ޗާގޯސް އައިލެންޑްސްގެ ސިޔާދަތީ ބާރު އޮންނާނީ މޮރިޝަޝްގެ މައްޗަށް ކަމަށް އދ. ގެ އާއްމު މަޖިލީހުން ކަނޑައެޅި ގަރާރަކީ ރާއްޖެ އާއި ޗާގޯސް ދެމެދު ކަނޑުގެ އިން ވަކިކުރުމުގެ މައްސަލައާއި އެއްވެސް ގޮތަކުން ގުޅުންހުރި ގަރާރެއް ނޫން ކަމަށެވެ.
ސަރުކާރުން ބުނީ އެ ނިންމުމުގެ ސަބަބުން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) ގައި ހިނގާ އިމުގެ މައްސަލާގައި ރާއްޖެއިން ނެގި ސްޓޭން ބަދަލު ނުވާނެކަމަށާއި އެކަން މޮރިޝަސް ސަރުކާރަށް ވެސް އަންގާފައި ވާނެކަމަށެވެ.
ނަމަވެސް ޗާގޯސްގެ މައްސަލާގައި އިނގިރޭސިވިލާތާއި މޮރިޝަސް ދެމެދު އުފެދިފައިވާ މައްސަލާގައި ރާއްޖެ މީގެ ކުރިން މޮރިޝަސްއާ ދެކޮޅަށް ވޯޓުދިން ނަމަވެސް އަލުން މައްސަލަ ހުށަހެޅިއްޖެނަމަ ރާއްޖެއިން މޮރިޝަސްއަށް ތާއީދު ކުރާނެކަން މޮރިޝަޝް ސަރުކާރަށް އަންގާފައިވާނެކަމަށްވެސް ދިވެހި ސަރުކާރުގެ ބަޔާނުގައި ބުނެފައިވެއެވެ.
ސަރުކާތުން ބުނީ ޗާގޯސްގެ ސިޔާދަތީބާރުގެ މައްސަލާގައި މޮރިޝަޝްއަށް ތާއީދު ކުރުމަށް ނިންމީ އިންޓަނޭޝަނަލް ކޯޓް އޮފް ޖަސްޓިސްގެ އިސްތިޝާރީ ލަފާގައި ޗާގޯސްގެ މައްޗަށް މޮރިޝަސްގެ ސިޔާދަތީ ބާރު އޮތްކަމަށް ނިންމި ނިންމުން އިޓްލޮސްގައި ކުރިއަށްދާ މައްސަލައިގައި ފުރިހަމައަށް ބަލައިގަތުމަށް ނިންމާފައިވާކަން އިޓްލޮސްއިން އެންގުމާ ގުޅިގެން ކަމަށެވެ.
ޗާގޯސް މައްސަލާގައި މޮރިޝަސް އާ ދެކޮޅަށް ރާއްޖެއިން ކުރިން ވޯޓުލާފައިވީ ނަމަވެސް 2019 ވަނަ އަހަރު އ.ދ.ގެ ޢާއްމު މަޖިލީހުން އެޤަރާރު ފާސްކުރުމާއި ގުޅިގެން ރާއްޖެއިން ލީ ވޯޓުގެ އެކްސްޕްލެނޭޝަނުގައި ރާއްޖެއިން ފާހަގަކުރިގޮތުގައި ރާއްޖޭގެ ވޯޓަކީ އެޤަރާރާ ދެކޮޅަށް ލީ ވޯޓެއް ނންކަމަށާއި އެއީ އިސްތިޢުމާރިއްޔަތާ ދެކޮޅަށް ރާއްޖެއިން ގެންގުޅެމުން އައި ޒަމާންވީ ސިޔާސަތާ ވެސް ދެކޮޅު ވޯޓެއް ނޫންކަމަށް ސަރުކާރުގެ ބަޔާނުގައި ވެއެވެ.
ސަރުކާރުން ބުނީ އެގަރާރާ ދެކޮޅަށް ރާއްޖެއިން ލީ ވޯޓަކީ ޓްލޮސްގައި ކުރިއަށްދާ ރާއްޖެއާއި ޗާގޯސް އާކިޕެލާގޯގެ ކަނޑުގެ އިން ވަކިކުރުމާ ގުޅޭ މައްސަލައިގައި ރާއްޖެއިން ނަގާފައިވާ ގާނޫނީ ނުކުތާތަކަށާއި ކޮމިޝަން އޮން ދަ ލިމިޓްސް އޮފް ދަ ކޮންޓިނެންޓަލް ޝެލްފް (ސީ.އެލް.ސީ.އެސް) އަށް 2010 ވަނަ އަހަރު ރާއްޖެއިން ހުށައަޅާފައިވާ ހުށައެޅުމަށް އެއްވެސް އުނިއިތުރުކަމެއް ގެނުވާނެ ކަމެއް ނޫން ކަމަށެވެ.
ރާއްޖޭގެ ގާނޫނުތަކާއި ބައިނަލްއަޤުވާމީ ޤާނޫނުތަކުގެ ދަށުން، ރާއްޖޭގެ ހާއްސަ އިގްތިސާދީ ސަރަޙައްދުގެ އިން ކަނޑައެޅުމަކީ ދިވެހި ސަރުކާރަށް ޤާނޫނު އަސާސީން ލިއްބައިދީފައިވާ ބާރަކަށްވީހިނދު އެ މަސްއޫލިއްޔަތު ދިވެހި ސަރުކާރުން ފުރިހަމައަށް ކަށަވަރުކުރާނެކަމަށްވެސް ސަރުކާރުން ބުނުއެވެ.
މޮރިޝަސްއިން އިޓްލޮސްއަށް މައްސަލަ ހުށައެޅުމާއެކު، އިޓްލޮސް މެދުވެރިކޮށް މިމައްސަލައަށް ހައްލުހޯދައި ރާއްޖޭގެ އެންމެ މަތީ މަސްލަހަތު ހިމާޔަތްކުރުމަށް ދިވެހިރާއްޖޭގެ ސަރުކާރުން ނިންމީ ވަޒީރުންގެ މަޖީލީހުގައި އެކަމާ ގުޅޭގޮތުން މަޝްވަރާ ކުރުމަށްފަހުކަމަށްވެސް ސަރުކާރުން ބުނެއެވެ.
ސަރުކާރުން ބުނީ އިދިކޮޅުގެ ބަޔާނަކީ ދިވެހި ރައްޔިތުންނަށް އޮޅުވާލުމަށާއި ރައްޔިތުންގެ މެދުގައި ނުހަނު ހައްސާސް މައްސަލައެއްގައި ސިޔާސީ މަންފާ ހޯދުމަށް ހިންގާފައިވާ ދަށުދަރަޖައިގެ އަމަލެއްކަމަށެވެ.
ސަރުކާރުން ބުނީ އިޓްލޮސްގައި ކުރިއަށްދާ މައްސަލާގެ އިބްތިދާއީ މަރުޙަލާގައި ޕްރިލިމިނަރީ އޮބްޖެކްޝަންސްގެ ގޮތުގައި ޗާގޯސް އާކިޕެލާގޯގެ ސިޔާދަތީ ބާރުވެރިކަމާ ގުޅޭގޮތުން އިނގިރޭސިވިލާތާއި މޮރިޝަސްއާ ދެމެދު އުފެދިފައިވާ ހިޔާލު ތަފާތުވުމާ ގުޅޭ މައްސަލައެއް ކުރިއަށް ދަނިކޮށް އިޓްލޮސްއަށް ހުށަހެޅިފައިވާ މައްސަލަ ބެލުމުގެ އިހްތިސާސް އެޓްރައިބިއުނަލަށް ލިބިގެންނުވާކަމަށް ރާއްޖެއިން ވަކާލާތުކޮށްފައިވާނެކަމަށެވެ.
ނަމަވެސް، އިބްތިދާއީ އަޑުއެހުންތަކަށްފަހު އިޓްލޮސް އިން ނިންމެވީ ޗާގޯސް އާކިޕެލާގޯގެ ސިޔާދަތީ ބާރުވެރިކަމާ ގުޅޭގޮތުން އައި.ސީ.ޖޭ އިން ނެރެފައިވާ އިސްތިޝާރީ ލަފައަށް ރިއާއަތްކޮށް މޮރިޝަސްއިން އިޓްލޮސްއަށް ހުށަހަޅާފައިވާ މައްސަލަ ބެލުމުގެ އިހްތިސާސް އެޓްރައިބިއުނަލަށް ލިބިގެންވާކަމަށްކަމަށާއި އިޓްލޮސްގެ މިނިންމުމާއި ގުޅިގެން، އެޓްރައިބިއުނަލުގެ އަޑުއެހުންތަކުގައި ދިވެހި ސަރުކާރުން ވަކާލާތުކޮށްފައި ވާނީ ރާއްޖެއާއި ޗާގޯސް އާކިޕެލާގޯއާ ދެމެދުވާ ކަނޑުގެ ސަރަޙައްދުގެ އިން ވަކިކުރުމުގެ މައްސަލައިގައި ކުރިއްސުރެ ރާއްޖެއިން ގެންގުޅެމުންދިޔަ ސިޔާސަތުތައް ދިފާއުކޮށްފައި ކަމަށްވެސް ސަރުކާރުގެ ބަޔާނުގައި ބުނެފައިވެއެވެ.
