މިއަދު ކޯޓުގައި ކުރިއަށް ދިޔަ އަޑުއެހުމަކީ ކެރޯލް ރޭޕުކުރި ވާހަކަ ދެއްކީ އެނާގެ ފޮތް ވިއްކަން ވެގެންކަމަށް ވިދާޅުވެ ޓްރަމްޕު ދައްކަވާފައިވާ ވާހަކަތަކުން ލިބުނު ގެއްލުމުގެ ބަދަލު ހޯދުމަށް އެދުމުން ކުރިއަށް ގެންދިޔަ އަޑުއެހުމެވެ.
މި އަޑުއެހުމުގެ ދައުލަތުގެ ފަރާތުންނާއި، ޓްރަމްޕުގެ ފަރާތުން މިއަދު ވަނީ ކެރޯލް އާއި ޓްރަމްޕު ރޭޕުކުރި ގޮތުގެ ތަފްސީލު ސުވާލުތަކެއް ކޮށްފައެވެ.
އަބުރުގެ މައްސަލައިގައި ކުރީގެ ރައީސް ޑޮނަލްޑް ޓްރަމްޕާ ދެކޮޅަށް ކެރޯލް ކުރި ސިވިލް ދައުވާގެ ތިން ވަނަ ދުވަހު ޓްރަމްޕްގެ ވަކީލު ޖޯ ޓަކޯޕީނާ، ބުނި ގޮތުގައި އޭނާގެ ތުހުމަތު ބޭނުންކުރީ ފޮތެއް ވިއްކުމަށް މަގުބޫލުކަން ހޯދާށެވެ. އަދި 2016 ވަނަ އަހަރު ޓްރަމްޕު ވެރިކަމަށް ކުރިމަތި ލެއްވިއިރު ވެސް އެވާހަކަ ނުދެއްކީ ކީއްވެތޯ އެނާ ކެރޯލް އާއި ސުވާލުކުރިއެވެ.
ކެރޯލް ބުނާގޮތުން ޓްރަމްޕު އޭނާ ރޭޕްކުރީ 1990 ގެ އަހަރުތަކުގެ މެދުތެރޭގައި ނިއުޔޯކްގެ ޑިޕާޓްމަންޓް ސްޓޯރެއްގެ ޗޭންޖިން ރޫމެއްގައެެވެ.
ލިޔުންތެރިޔާ އީ ޖީން ކެރޯލް
ކެރޯލް ބުނީ ޓްރަމްޕުގެ އަނިޔާވެރިކަމުގެ ވާހަކަ ދައްކަން ނިއުޔޯކް ޓައިމްސް އިން ހާވީ ވެއިންސްޓައިންގެ ޖަރީމާތައް ހާމަކުރުމުން މުޅި އެމެރިކާގެ އަންހެނުންނަށް ޖިންސީ އަނިޔާގެ އަމިއްލަ ތަޖުރިބާތައް ކިޔައިދިން "މީޓޫ" ހަރަކާތުގެ ސަބަބުންކަމަށެވެ.
ޓްރަމްޕް ރިޔާސީ އިންތިހާބަށް ކުރިމަތިލެއްވި އިރު އެކަމަނާ ވާހަކަ ނުދެއްކީ ކީއްވެތޯ ސުވާލު ކުރުމުން ކެރޯލް ބުނީ އޭރު އޭނާއަށް އެވާހަކަ ދައްކާނެ ހިތްވަރެއް ނެތްކަމަށެވެ.
ޓްރަމްޕުގެ ވަކީލު ވަނީ ހަޅޭއްލަވައި ނުލަނީ ކީއްވެގެންތޯއާއި، އޭނާ އެވަގުތު ހޭން ފެށީ ކީއްވެތޯ ސުވާލުކޮށްފައެވެ.
ކެރޯލް ބުނީ ޗޭންޖިން ރޫމްގައި ކުއްލިއަކަށް ޓްރަމްޕް އޭނާއަށް ހަމަލާ ދިނުމުން އޭނާއަށް ހަދާނެ ގޮތް ނޭގިގެން ހޭން ފެށުނުކަމަށެވެ.
މިހެންކަމުން ޓްރަޕުގެ ދިފާއީ ވަކީލުން ތަކުރާރުކޮށް ކެރޯލް ގާތު އޭނާ ހަޅޭލަވައި ނުގަތީ ކީއްވެތޯ ސުވާލުކުރިއެވެ.
ކެރޯލް ބުނީ ރޭޕް ރިޕޯޓްކުރާ އަންހެނުންނާ ހަޅޭއްލަވައި ނުލެވުނީ ކީއްވެތޯ ގިނައިން ސުވާލު ކުރާ ކަމަށާއި އެއީ ފުލުހުންނަށް ވެސް ގިނަ މީހުން ނުދާ އެއް ސަބަބު ކަމަށެވެ.
އަދި ފުލުހުންނަށް ނުގުޅައި، އޭގެ ބަދަލުގައި އޭނާގެ ރަހުމަތްތެރިއެއް ކަމަށްވާ ލީސާ ބިރްންބަކް އަށް ގުޅާފައިވާތީ ވެސް ސުވާލުކުރިއެވެ.
އޭނާ ބުނީ ރޭޕު ކުރި ނަމަވެސް ފުލުހުންނަށް ދާން ފަސް ޖެހުނީ ޓްރަމްޕަކީ ބާރުގަދަ މީހަކަށް ވާތީކަމަށެވެ.
މީގެ 30 އަހަރު ކުރިން ހިގާފައިވާ ރޭޕުގެ މައްސަލައިގައި އޭނާ މިހާ ދުވަހު ފުލުހަށް ނުގޮސް މަޑުކުރި ސަބަބު ކިޔައިދެމުން އޭނާ ބުނީ “ގިނަ އަންހެނުން ފުލުހަށް ނުދޭ. އަހަންނަށް ވިސްނޭ ކީއްވެގެންކަން، އެއީ އެމީހުން ކުރާ ސުވާލަކީ ކީއްވެތޯ ބާރަށް ހަޅޭލަވައިނުގަތީ،”ރޭޕް ކުރި ވަގުތު ބާރަށް ހަޅޭ ނުލެވީ ކީއްވެތޯ ދިފާއީ ވަކީލުން ސުވާލު ކުރުމުން ކެރޯލް ބުންޏެވެ.
ކެރޯލް ކިޔައިދިން ގޮތުގައި އޭނާއަށް ޓްރަމްޕު ހަމަލާ ދިނީ ޑްރެސިން ރޫމެއްގެ ތެރެއިން އޭނާ ފާރާލައި ފިއްތާލައިގެންނެވެ.
ކެރޯލް ބުނީ ޓްރަމްޕަކީ "އަނިޔާވެރި، ނުރައްކާތެރި މީހެއް" ކަމަށެވެ.
