އިސްލާމިކް މިނިސްޓްރީން ބުނީ މިދިޔަ އަހަރާއި މި އަހަރުގެ މިހާތަނަށް އުމްރާއަށް މީހުން ގެންދިއުމުގެ ހުއްދަ ދީފައިވާ ކުންފުނިތަކުގެ ތެރެއިން މި އަހަރު އަލަށް ހުއްދަ ދީފައިވަނީ 14 ކުންފުންޏަކަށް ކަމަށެވެ.
އާ ގަވާއިދުގެ ދަށުން އުމްރާއަށް މީހުން ގެންދިއުމުގެ ހުއްދައަށް ކޮންމެ އިރަކުވެސް އެދެވޭނެ އެވެ. އަދި ހުއްދަ ހަމަވުމުގެ 30 ދުވަސް ކުރިން މިނިސްޓްރީއަށް ފޯމު ހުށަހެޅިދާނެ އެވެ. އުމްރާއަށް މީހުން ގެންދިއުމުގެ ހުއްދައަށް އެދޭއިރު 20،000 ރުފިޔާގެ ފީއެއް ނަގާއިރު، ހުއްދަ އާކުރާ ނަމަ 15،000 ރުފިޔާގެ ފީއެއް ނަގާ ކަމަށް މިނިސްޓްރީން ބުންޏެވެ.
މިނިސްޓްރީން އިތުރަށް ބުނީ ހުއްދައިގެ ކުރިން ނުވަތަ ހުއްދަ އާކުރުމުގެ ކުރިން އެއް ވެސް ބައެއްގެ އަތުން ފައިސާ ނަގައިގެން ނުވާނެ ކަމަށެވެ. އަދި އުމްރާއަށް ގެންދިއުމުގެ ހުއްދަ އޮތް ފަރާތެއްކަން ކަށަވަރު ނުކޮށް ފައިސާ ދެއްކުމަށް ފަހު އެއްވެސް މައްސަލައެއް ދިމާވެއްޖެ ނަމަ، އޭގެ ޒިންމާ ނަގަންޖެހޭނީ އެ ފައިސާ ދެއްކި ފަރާތުން ކަމަށެވެ.
