ރައީސް ނަޝީދު މިހެން ވިދާޅުވެފައި މިވަނީ ރާއްޖެއާއި މޮރިޝަސްއާއި ދެމެދު ފުށުއަރާ ކަނޑުގެ ސަރަހައްދުގެ ތެރެއިން 47،232 ކިލޯމީޓަރު ރާއްޖެއަށް އަދި 45،331 ކިލޯމީޓަރު މޮރިޝަސްއަށް ލިބިގެންވާ ކަމަށް އިޓްލޮސްއިން އިއްޔެ ކުރި ހުކުމާ ގުޅިގެންނެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވީ ރާއްޖޭގެ ކަނޑުގެ ސަރަހައްދުން ބައެއް ގެއްލުނީ ޗާގޯސް ރަށްތަކުގެ ސިޔާދަތީ ބާރު ރާއްޖެއިން ދޫކޮށްލުމުން ކަމަށެވެ.
ރައީސް ނަޝީދު އަންނަނީ ޗާގޯސް އަކީ ރާއްޖޭގެ ސިޔާދަތީ ބާރު ހިނގަން ޖެހޭ ތަނެއް ކަމަށް ތަކުރާކޮށް ވިދާޅުވަމުންނެވެ. އަދި މޮރިޝަސްގެ ސަރުކާރަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފޮނުއްވި ސިިޓީފުޅު ހާމަ ކުރެއްވުމަށްވެސް އެތަށް ފަހަރަކު ރައީސް ނަޝީދު ވަނީ ގޮވާލައްވާފަ އެވެ.
މީގެ ކުރިން ރައީސް ނަޝީދު ނެރުއްވި ބަޔާނެއްގައި ބުނެފައި ވަނީ ރާއްޖެއިން ބައެއް ދޫކޮށްލުން ވެގެން ދާނީ ރާއްޖޭގެ މަސްވެރިކަމަށް ގެއްލުންތަކެއް ކުރިމަތިވެދާނެ ކަމެއް ކަމަށެވެ.
