ދިވެހި ޕްރިމިއާ ލީގުގެ ޓައިޓަލް ސްޕޮންސަރަކަށް އެމްޑަބްލިއުއެސްސީ ނުވަތަ ދައުލަތުގެ ފެން ކުންފުނި ހަމަ ޖެހުމާއެކު އެ ކުންފުނި ވެގެންދާނީ ދިވެހި ލީގަށް ޓައިޓަލް ސްޕޮންސަކަށް ޓެލެކޮމިއުނިކޭޝަން ދާއިރާއިން ބޭރުން ހަމަ ޖެހުނު ފުރަތަމަ ކުންފުންޏަށެވެ. މީގެ ކުރިން ލީގުގެ ޓައިޓަލް ސްޕޮންސާޝިޕް މުޅިން ވެސް ނަގައިފައިވަނީ މުޅިންވެސް ދިރާގާއި އުރީދޫ އެވެ.
އެފްއޭއެމްގެ ރައީސް ބައްސާމް އަދީލް ޖަލީލް މިއަދު ކުރެއްވި ޓްވީޓްގައިވާ ގޮތުން ލީގުގެ ސްޕޮންސަރަކަށް އެމްޑަބްލިއުއެސްސީ ހަމަޖެއްސީ މި ސީޒަނަށެވެ.
އާ ސީޒަންގެ ދިވެހި ލީގު ފެށޭނީ މިއަދު ހަވީރުއެވެ. މިއަދު ހަވީރު ފުރަތަމަ މެޗުގައި ވާދަ ކުރާނީ ކްލަބް ވެލެންސިއާ އާއި ޓީސީ ސްޕޯޓްސް ކްލަބެވެ.
މި އަހަރަކީ އަށް ޓީމު ބައިވެރިކޮށްގެން ލީގު ކުރިއަށްގެންދާނެ ފަހު އަހަރެވެ. އެފްއޭއެމުން ނިންމާފައި ވަނީ އަންނަ އަހަރު އަތޮޅުތެރެއިން ތިން ޓީމާއި މާލޭ ޒޯނުން މި އަހަރުގެ ދެވަނަ ޑިވިޝަންގެ ޗެމްޕިއަން ޓީމާ އެކު ޖުމުލަ 12 ޓީމު ހިމެނޭ ހޯމް އެންޑް އަވޭ އުސޫލުން ލީގު ކުޅުމަށް ހަމަޖައްސައިފަ އެވެ.