މަޖިލީހުގެ އިއްޔެގެ ޖަލްސާގައި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ ރައީސް ނަޝީދު އަވަހާރަކޮށްލުމަށް ކެނެރީގޭ ހުންނަ ގޯޅީގައި ސައިކަލެއް ބަހައްޓާ އެ ސައިކަލުގައި ބޮމެއް ހަރުކޮށްގެން ރައީސް ނަޝީދު ނިކުންނަވާ ގަޑީ އެ ބޮން ގޮއްވާލަން އުޅޭ ކަމުގެ މައުލޫމާތު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ލިބިވަޑައިގެންފައިވާކަމުގެ މައުލޫމާތު ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ލިބިފައިވާ ކަމަށެވެ.
މީގެ އިތުރުން މެރީ ބްރައުން ސަރަހައްދުގައާއި ޔާގޫތުގޭ ސަރަހައްދުގައި ބޮމެއް ގޮއްވާލާ ރައީސް ނަޝީދު އަވަހާރަކޮށްލަން އުޅުނުކަމުގެ މައުލޫމާތުވެސް ރައީސް ސޯލިހަށް ލިބުނުކަން 241 ކޮމިޓީއަށް އިނގޭކަމަށް ހަސަން ވިދާޅުވި އެވެ.
ހަސަންގެ ވާހަކަތަކަށް ބާރު ދެއްވާ ރިޔާސަތުގައި އިންނެވި ރައީސް ނަޝީދު ވަނީ، އެއީ ތެދު ވާހަކަ ތަކެއްކަން ތަހުގީގުން މިހާރު ޔަގީންވެފައިވާ ކަމަށެވެ.
ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ބޮންގޮއްވަން އުޅުމާގުޅޭ ވަކި ސްޕެސިފިކް ހަމަލާއަކާ ބެހޭގޮތުން ރައީސްއަށް މައުލޫމާތެއް ކުރިން ލިބިވަޑައިގެންފައި ނުވާ ކަމަށެވެ.
މިއުވާން ވިދާޅުވީ ބޮމުގެ ހަމަލާއާ ގުޅޭގޮތުން މިހާރު ދައްކަމުންދާ ވާހަކަތަކަކީ ސިޔާސީ ބޭނުމަކަށް ދައްކާ ސިޔާސީ ވާހަކައެއް ކަމަށެވެ.
މިއުވާން ވިދާޅުވީ މަޖިލީހުގައި ދައްކާ ވާހަކަތަކަށް އިމްތިޔާޒް ލިބޭތީ، ހަގީގަތާ ހިލާފު ދޮގު ވާހަކަ ފަތުރައިގެން ނެތް ތާއީދު އަލުން ހޯދުމަށް އުޅޭއުޅުން ބަލައި ނުގަންނަ ކަމަށެވެ.
