އާބަންކޯއިން ބުނީ އެ ކޯޕަރޭޝަނުގެ ޓީމުން މިހާރު ވަނީ ބައިވެރިންނާ އެކު ޕްރެކްޓިސްތައް ފަށާފައި ކަމަށެވެ. އާބަންކޯގެ ޓީމް އެކުލަވާލާފައިވަނީ މީގެ ކުރިން ބައިބަލާ އެސޯސިއޭޝަނުން ބާއްވާފައިވާ މުބާރާތްތަކުގައި ވާދަކޮށް، އެންމެ މޮޅު ކުޅުންތެރިޔާ ނުވަތަ ބައިބަލާގެ ނަމުން ނަމަ މިސްޓަ ބައިބަލާގެ ޝަރަފު ހޯދާފައިވާ ގިނަ ކުޅުންތެރިންތަކަކާ އެކުގައި ކަމަށް އެ ކޯޕަރޭޝަނުން ބުނެއެވެ. އާބަންކޯއިން ބުނެފައިވަނީ އެ ކޯޕަރޭޝަނުގެ ޓީމުގެ ކޯޗުކަން ކުރަނީ ބައިބަލާގައި ތަޖުރިބާކާރު އަލީ ރިޒްވާން ކަމަށެވެ.
އޮފީސްތަކުގެ މެދުގައި ބާއްވާ ބައިބަލާ މުބާރާތް ޖޫން މަހުގެ 20 ވަނަ ދުވަހު ފެށުމަށް ތައްޔާރުވެފައިވާއިރު، މި މުބާރާތް ބާއްވަން ހަމަޖެހިފައިވަނީ ހުޅުމާލޭގައި ކަމަށް އާބަންކޯއިން ބުނެއެވެ. އާބަންކޯއިން ބުނީ މިއީ ރާއްޖޭގައި އޮފީސްތަކުގެ މެދުގައި ބާއްވާ ފުރަތަމަ ބައިބަލާ މުބާރާތް ކަމަށެވެ.
އިންޓަ އޮފީސް ބައިބަލާ މުބާރާތަށް ގިނަ މިސްޓަ ބައިބަލާއިންނާ އެކު އާބަންކޯގެ ޓީމުން ވަނީ ތައްޔާރުވާން ފަށާފައި - ފޮޓޯ:އާބަންކޯ
އާބަންކޯއިން ބުނި ގޮތުގައި ބައިބަލާ އެސޯސިއޭޝަނުން ކޮންމެ އަހަރަކު އީދު ތެރޭގައި ބާއްވާ ގައުމީ ބައިބަލާ މުބާރާތް މި އަހަރު ބާއްވާފައިވަނީ ހުޅުމާލޭގައި ކަމުގައެވެ. މި ފަހަރު ހުޅުމާލޭގައި މުބާރާތް ބޭއްވިއިރު، އެއީ ހުޅުމާލޭގައި އެ މުބާރާތް ބޭއްވި ފުރަތަމަ ފަހަރު ކަމަށް އެ ކޯޕަރޭޝަނުން ބުނެއެވެ. އާބަންކޯއިން ބުނީ ހުޅުމާލޭގައި ބައިބަލާ ކުޅުމަށް އެކަށީގެންވާ ފަދަ ކޯޓެއް އެ ކޯޕަރޭޝަނުން ގާއިމުކޮށްދީފައިވާ ކަމަށެވެ.
