ޗާގޯސް މައްސަލާގައި އިދިކޮޅު އިއްތިހާދުން މިރޭ ކާނިވަލުގައި ބޭއްވި ޖަލްސާގައި ޑރ މުނައްވަރު ވިދާޅުވީ ރާއްޖޭގެ ދެނުކުން ރާއްޖޭގެ ބޯޑަރު ފުށުއަރާ އެއްވެސް ގައުމެއް ނޯންނާނެ ކަމަށެވެ.
އެގޮތުން ޒަމާނުއްސުރެވެސް ޗާގޯސްއަކީ ގައުމެއް ނޫންކަމަށާއި އެއްވެސް ގައުމަކަށް ނިސްބަތްވާ ތަނެއްވެސް ނޫންކަމަށް ޑރ މުނައްވަރު ވިދާޅުވިއެވެ. މުނައްވަރު ވިދާޅުވީ ޗާގޯސްއަކީ އިނގިރޭސިން އިސްތިއުމާރުކޮށްފައިވާ އިނގިރޭސިންގެ ކޮލޮނީއެއް ކަމާށާއި އެއީ ގައުމެއް ނުވަތަ ގައުމެއްގެ މިލްކުގައިވާ ތަނެއްވެސް ނޫން ކަމަށެވެ.
މުނައްވަރު ވިދާޅުވީ ޗާގޯސްއަކީ ޒަމާނުއްސުރެވެސް އެއްވެސް ގައުމެއްގެ ބަޔަކަށް ނުވާއިރު އެތަން އެންމެ ފުރަތަމަ އިސްތިއުމާރު ކުރީ ފަރަންސޭސީން ކަމަށެވެ. އަދި ފަރަންސޭސީން އެތަން އިސްތިއުމާރު ކުރުމާ ހަމައަށްވެސް ޗާގޯސްގައި އެއްވެސް ބަޔަކު ވަޒަންވެރިވެފައި ނުވާކަމަށް ޑރ މުނައްވަރު ވިދާޅުވިއެވެ.
މުނައްވަރު ވިދާޅުވީ އެންމެ ކުރީގެ ޗާޓުތަކަށް ބަލާއިރުވެސް ޗާގޯސް މޮރިޝަސްގެ ތަނެއްގެ ގޮތުގައި ޗާޓު ކުރެވިފައިނުވާކަމަށާއި ޗާގޯސް އައިލެންޑް ޗާޓު ކުރެވިފައިވަނީ ރާއްޖޭގެ ތަނެއްގެ ގޮތުގައި ކަމަށެވެ.
ޗާގޯސްގެ މައްޗަށް މޮރިޝަސްއިން ދައުވާކުރާއިރު އެއީ ދިވެހިންގެ ތަނެއްކަމަށް މާބޮޑަށް ދިވެހިންނަށް ދައުވާ ކުރެވޭނެކަމަށާއި ރާއްޖޭގެ ކަނޑުން ގެއްލިގެން ދިޔަ ބައި އަނބުރާ ހޯދާއިރު، ޗާގޯސް ރާއްޖެއަށް ހޯދުމަށް މަސައްކަތް ކުރަންޖެހޭކަމަށާއި އެކަމަށް މަސައްކަތް ކުރުމަށް މިހާރުވެސް ދިވެހި ސަރުކާރަށް ގޮވާލާކަމަށް ޑރ މުނައްވަރު ވިދާޅުވިއެވެ.
