ފެނަކައިން ނެރެފައިވާ ނޫސްބަޔާނެއްގައި ބުނީ މިހާރަކަށް އައިސް ބައެއް ނޫސްތަކުން އެ ކޯޕަރޭޝަނުގެ ނަން ބޭނުންކޮށް، އެއްވެސް އަސާސެއް ނެތް ހިޔާލީ ވާހަކަތައް އުފައްދައި ޝާއިއު ކުރަމުން ދަނީ އެ ކޯޕަރޭޝަނަކީ ރާއްޖޭގެ އުތުރުން ދެކުނަށް، ރައްޔިތުންގެ އިތުބާރު ހޯދާފައިވާ މަގުބޫލު ބްރޭންޑަކަށް ވުމުން އެކަމުގެ ފައިދާ ނަގައި ނޫސް ކިޔުންތެރިން އިތުރުކުރުމުގެ ހީލަތްތެރި އުކުޅެއްގެ ގޮތުގައި ކަން ފާހަގަ ކުރެވިފައިވާ ކަމަށެވެ.
ފެނަކައިން ބުނެފައިވަނީ އެފަދަ ކަންކަން ކުރާ ފަރާތްތަކުން، އެ ފަރާތްތަކާއި މުޖުތަމައަށް ފައިދާހުރި ބޭނުންތެރި މަސައްކަތްތަކެއް ކުރުމަށް، ލިބިފައިވާ ވަގުތާއި ވަސީލަތްތައް ބޭނުން ކުރުމަށް ނަސޭހަތްތެރިވާ ކަމަށެވެ.
ދެހާސް އަށާރަ ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުން ފެށިގެން އެ ކޯޕަރޭޝަނުން ވަނީ، ކޯޕަރޭޝަނުގެ އެންމެ ބޮޑު ރައުސްމާލަކީ މުވައްޒަފުން ކަމުގައި ބަލައިގަނެ، މުވައްޒަފުންނަށް ބިރުފިލައި ތިބެ ހާސްކަމެއް ނެތި ވަޒީފާ އަދާކުރެވޭނެ ފަހި މާހައުލެއް ގާއިމުކޮށްދީ، އަނެކުންގެ މިނިވަންކަމާއި ހައްގުތަކަށް އަރައިނުގަނެ އަމިއްލައަށް ލިބިފައިވާ ހައްގުތައް ފުރިހަމައަށް ބޭނުން ކުރުމުގެ ފުރުސަތު ތަނަވަސްކޮށް ހުޅުވައިދީ ކަށަވަރު ކޮށްދީފައި ކަމަށް ފެނަކައިން ބުނެއެވެ.
ފެނަކައިން ބުނި ގޮތުގައި އެއްވެސް އަސްލެއް އަސާސެއް ނެތި، އެ ކޯޕަރޭޝަނުގެ މެނޭޖްމަންޓާއި ކުންފުނީގެ އަގު ވައްޓާލައި ނަން ކިލަނބު ކުރުމަށް ކުރާ ނާކާމިޔާބު މަސައްކަތް ހުއްޓާލުމަށް، އެފަދަ އެންމެހައި ފަރާތްތަކަށް ތަކުރާރުކޮށް އިލްތިމާސް ކުރާ ކަމުގައެވެ.
ފެނަކައިގެ ނަން ބޭނުން ކޮށްގެން ފައިދާ ހޯއްދެވުމަށް ވިސްނަވާނަމަ، ރިވެތި އަހުލާގާއި ސުލޫކުގެ ތެރެއިން އެކަމަށް މަގު ހޯދުމަށް އެދޭ ކަމަށް އެ ކޯޕަރޭޝަނުން ވަނީ ބުނެފައެވެ.
