ސީއެންއެމްއާ މިއަދު ވާހަކަ ދައްކަވަމުން އެ ދެބޭފުޅންވެސް މިއަދު ވިދާޅުވީ އެއީ ކަނޑައެޅިގެން ދޮގެއްކަމަށާއި، އެކަމުގައި އެކޮމިޝަނުގެ ރައީސް ފުއާދު ތައުފީގު އަމަލު ކުރައްވާފައިވަނީ ރަނގަޅަށް ނޫން ކަމަށެވެ.
ނަޝާތު ވިދާޅުވީ އެދެއްކި ވާހަކައިގެ ސަބަބުން ޑިމޮކްރެޓްސް އަޑީގައި ތިބެގެން އެބޭފުޅުން ފަލީހަތް ކުރަމުން ގެންދާ ކަމަށެވެ. އެހެންވުމުގެ ސަބަބުން އެ ކޮމިޝަނުގެ ރައީސަށް ތިން މެންބަރުންގެ އިތުބާރު ގެއްލިފައިވާ ކަމަށާއި ކޮމިޝަނުގެ ރައީސް ރިޔާސަތު ބަލަހައްޓަވާ ޖަލްސާ ތަކަށް ވަޑައިނުގަންނަވާނެ ކަމަށް ވިދާޅުވިއެވެ.
ކޮމިޝަނުގެ މެންބަރު މުހައްމަދު އާސިފްވެސް ވިދާޅުވީ އޭނާ މަސައްކަތް ކުރައްވަނީ މިނިވަންކަމާއެކު ކަމަށާއި އެކުރާ ތުހުމަތަކީ ކަނޑައެޅިގެން ދޮގެއްކަމަށާއި ، އެއްވެސް މީހެއްގެ ނުފޫޒެއް ނެތަކަމަށެވެ.
އާސިފް ވިދާޅުވީ ދަ ޑިމޮކްރެޓްސް ރަޖިސްޓްރީ ކުރުމުގެ މަސައްކަތް ކުރެވެން ފެށުނު ހިސާބުން ފެށިގެން ކޮމިޝަނުގެ ރައީސް، ޒާތީ ކަމެއް ނަންގަވައިގެން މަސައްކަތް ކުރައްވަން ފައްޓަވާފައިވާ ކަމަށެވެ. އަދި ޑިމޮކްރެޓްސްގެ ބޭފުޅުންނަށް ގުޅުއްވައި އާސިފާއި ނަޝާތާ ދެބޭފުޅުން އެޕާޓީ އުފެއްދުމަށް ހުރަސް އަޅުއްވާ ކަމަށް ވާހަކަ ދައްކަވާފައިވާ ކަމަށާއި އަދި އެކަންކަމަކީ ރަނގަޅު ކަންކަމެއް ނޫން ކަމަށް ވިދާޅުވިއެވެ.
އާސިފް ވިދާޅުވީ ކޮމިޝަނުގެ ރައީސްގެ އަމަލުތައް ހުންނަގޮތުން ދެން އެކޮމިޝަނުގައި ރައީސް ފުއާދު ރިޔާސަތު ބަލަހައްޓަވާ ޖަލްސާއެއްގައި ބައިވެރިވެވަޑައި ނުގަންނަވާނެ ކަމަށެވެ.
