އަލީ ޝާމިން އެމްޑީޕީއަށް ސޮއި ކުރައްވާފައިވަނީ އިއްޔެގެ ވަގުތެއްގައިއެވެ.
ޖުމްހޫރީ ޕާޓީގެ ފަރާތުން ރިޔާސީ އިންތިހާބުގައި އެޕާޓީގެ ލީޑަރު ވާދަކުރަން ނިންމުމާއި އެކު ޖޭޕީގެ ކައުންސިލުން އިސްތިއުފާ ދެއްވި މެމްބަރުން އެމްޑީޕީއަށް ސޮއި ކުރި ރަސްމިއްޔާތުގައި ސޮއި ކުރެއްވުމަށްފަހު އަލީ ޝާމިން ވިދާޅުވީ ރައީސް ސޯލިހް އަށް ދެވަނަ ދައުރެއް ހޯދައި ދެއްވުމަށް ރާއްޖޭގައި ހަރަކާތްތެރިވާ އެންމެ ބޮޑު ޕާޓީ އެމްޑީޕީއަށް ސޮއިކުރައްވައިފިކަމަށެވެ.
ޖޭޕީން ވަކިވި ބައެއް ބޭފުޅުން އިއްޔެ އެމްޑީޕީއަށް ސޮއިކުރިއިރު، ޖޭޕީގެ ލީޑަރު ގާސިމް އިބްރާހިމް ރިޔާސީ އިންތިހާބުގައި ވާދަ ކުރެއްވުމަށް ނިންމެވި ހިސާބުން ސަރުކާރުގެ މަގާމުތަކުގައި ތިއްބެވިޖޭޕީގެ ގިނަ އަދަދެއްގެ މެމްބަރުން އެޕާޓީން ވަކިވި އެވެ.
އަދި ބައެއް ބޭފުޅުން ވަނީ ޖޭޕީގައި ދެމި ތިއްބެވި ނަމަވެސް އަންނަ ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހްއަށް ތާއީދު ކުރުމަށް ނިންމަވާފައެވެ. އޭގެތެރޭގައި ޓްއަރިޒަމް މިނިސްޓަރު އަބްދުﷲ މައުސޫމް ފާހަގަ ކޮށްލެވެއެވެ.
