އެރިޓްރިއާގައި ހިފެހެއްޓި ދެ ބޯޓާ ގުޅޭގޮތުން އެފްއެސްއެމްގެ މެނޭޖިން ޑިރެކްޓަރު މުހައްމަދު ގަސަމް "ސީއެންއެމް" އަށް ވިދާޅުވީ ބޯޓުތައް ގެނައުމުގެ މަސައްކަތް ފޮރިން މިނިސްޓްރީ މެދުވެރިވެގެން ކުރަމުންދާ ކަމަށެވެ.
"ފޮރިން މިނިސްޓްރީ މެދުވެރިވެގެން ކުރަމުންދާ މަސައްކަތުގެ އިތުރުން އެފްއެސްއެމްގެ ގާނޫނީ ކަންތައްތައް ބަލަހައްޓާ ފަރާތުން އެރިޓްރިއާގައި ލޯޔަރެއް ހަޔާކޮށްގެން ބޯޓުތައް ސަލާމަތް ކުރުމަށް މަސައްކަތް ކުރަމުންއެބަދޭ،" ގަސަމް ވިދާޅުވިއެވެ.
އެރިޓްރިއާގައި އެފްއެސްއެމްގެ ދެ ބޯޓާއި ޕެޓްރޯލިއަމް ލިންކް ޕްރައިވެޓް ލިމިޓެޑްގެ ބޯޓެއް ހިމެނޭހެން ރާއްޖޭގެ ތިން ތެޔޮ ބޯޓެއް ހިފަހައްޓާފައިވާއިރު އެ ބޯޓުތަކުގައި ތިބި ފަޅުވެރިން ދޫކޮށްލުމުން މިދިޔަ މަހުގެ ދެވަނަ ދުވަހު ރާއްޖެއަށް ގެނެސްފައިވާ ކަމަށް އެފްއެސްއެމުން މީގެ ކުރިން ވަނީ ބުނެފައެވެ.
އެރިޓްރިއާގައި ހިފެހެއްޓި ބޯޓުތަކާ ގުޅޭގޮތުން ފޮރިން މިނިސްޓްރީގެ ކޮމިއުނިކޭޝަން ސްޓްރެޓީޖިސްޓް، ސަފާތު އަހްމަދު ޒާހިރު "ސީއެންއެމް" އަށް މީގެ ކުރިން ވިދާޅުވެފައިވަނީ އެފްއެސްއެމްގެ ބޯޓުތައް ގެނައުމަށް ޑިޕްލޮމެޓިކް ޗެނަލްސް މެދުވެރިކޮށް އެރިޓްރިއާ އާއެކު މަޝްވަރާކުރެވެމުންދާ ކަމަށެވެ.
އެރިޓްރިއާގެ ސިފައިން ބޯޓުތައް ހިފަހައްޓާފައިވަނީ ހުއްދަ ނުހޯދާ އެ ގައުމަށް އެތެރެވި ކަމަށް ބުނެއެވެ. މިދިޔަ އެޕްރީލް މަހުގެ 26 ވަނަ ދުވަހު ބޯޓުތައް އެރިޓްރިއާގައި ބަނދަރުކޮށްފައިވަނީ މިސްރުން ފުރައިގެން ރާއްޖެއަށް ކުރި ދަތުރުގައި މޫސުން ގޯސްވެ ބޯޓެއްގެ ހުންގާނަށް މައްސަލައެއް ދިމާވުމުގެ ސަބަބުންނެވެ.
އެފްއެސްއެމުން 2019 ވަނަ އަހަރު ތެޔޮ އުފުލުމަށް ހަތަރު ބޯޓެއް ބަންނަން މިސްރުގެ ކުންފުންޏަކާ ހަވާލުކުރިއިރު، މީގެކުރިން އެ ކުންފުނިން ވަނީ އޭގެތެރެއިން ދެ ބޯޓު ރާއްޖެއަށް ގެނެސްފައެވެ.
