މި ހުކުމް އައީ ބ.ތުޅާދޫ، ދުންފިނިގެ، ނިޝާން އިބްރާހީމްގެ މައްޗަށެވެ. ކުޑަ ކުދިންގެ މަސްލަހަތު ހިމެނޭ މައްސަލައެއް ކަމުން މި މައްސަލަ ކޯޓުގައި ކުރިއަށް ގެންދިޔައީ އާއްމުކޮށް ހުޅުވާނުލައެވެ.
މި މައްސަލައިގައި ނިޝާން އިބްރާހީމްގެ މައްޗަށް އުފުލީ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ކުށުގެ ދެ ދައުވާ އެވެ.
ކްރިމިނަލް ކޯޓުން ބުނީ ނިޝާން އިބްރާހީމްގެ މައްޗަށް ދެ ދައުވާ އުފުލާފައިވަނީ 2019 ވަނަ އަހަރުގެ އެކިދުވަސް މަތިން، މި މައްސަލާގައި އަނިޔާ ލިބުނު ކުއްޖާގެ ގެއަށް ގޮސް، ޖިންސީ ނިޔަތެއް އޮވެގެން ގަސްދުގައި އަތްލާފައިވާތީ ކަމަށެވެ.
ނިޝާންވަނީ އޭނާގެ މައްޗަށް ކުރި ދެ ދައުވާއަށްވެސް އިންކާރުކޮށްފައެވެ. އެހެންވެ މައްސަލަ ސާބިތުކުރަން ދައުލަތުން ހުށަހެޅި ހެކި ގަރީނާއަށް ރިއާޔަތްކުރުމުން މި ކުށުގެ މާއްދީ ރުކުނާއި މައުނަވީ ރުކުން، އެކަށީގެންވާ މިންވަރެއްގެ ޝައްކެއްނެތި ސާބިތުވާ ކަމަށް ކޯޓުން ބުންޏެވެ.
ކްރިމިނަލް ކޯޓުން ބުނި ގޮތުގައި މި ދެ މައްސަލައިގެ ހުކުމް އިއްވީ ގާޒީ އިސްމާއިލް ޝަފީއުއެވެ.
