އިންޓަ މަޔާމީއަށް މެސީ ކުޅޭ ފުރަތަމަ މެޗަކަށް ވެގެންދާނީ މިރޭ މެކްސިކޯގެ ކްލަބަކާ ދެކޮޅަށް ކުޅޭ މެޗެވެ. މިއީ އެމެރިކާ ލީގު އަދި މެކްސިކޯ ލީގުގެ ޓޮޕް ޓީމުތަކުގެ މެދުގައި ކުޅެވޭ ލީގްސް ކަޕްގެ މެޗެކެވެ. މެޗު ފެށޭނީ ރާއްޖޭ ގަޑިން މިރޭ ފަތިހު ފަހެއް ޖަހާއިރުއެވެ.
އިންޓަ މިޔާމީއަށް ސޮއިކޮށް އެ ކްލަބުގެ ޕްރެކްޓިހުގައި މެސީ ބައިވެރިވާން ފެށީ މިދިޔަ ހަފްތާގައެވެ. ޕީއެސްޖީއާއެކު ހަދާފައިވާ އެއްބަސްވުމުގެ މުއްދަތު ހަމަވުމުން، މެސީ އިންޓަ މިއާމީއަށް ބަދަލުވުމަކީ ގިނަ ބަޔަކު ހައިރާންވި ކަމެކެވެ. ގިނަ ބަޔަކު ގަބޫލުކުރީ އޭނާ ބަދަލުވާނީ ސައުދީ އަރަބިއްޔާއަށް ކަމަށެވެ. ނަމަވެސް ގިނަ ބަޔަކު ހީކުރި ގޮތާއި ހިލާފަށް އިންޓަ މިއާމީއިން މެސީ ހޯދި ގޮތް އެކްލަބުގެ އެއް ހިއްސާދަރު ކަމުގައިވާ ޖޯޖް މާސް ވަނީ މީޑިއާއަށް ހާމަކޮށްފައެވެ.
ޖޯޖް ކިޔައިދިން ގޮތުގައި އެކްލަބުން ވަނީ 2019 ވަނަ އަހަރުން ފެށިގެން މެސީ އޭޓިމަށް ގެންދެވޭނެ ގޮތްތަކެއް ހޯދުމަށް މަސައްކަތް ކޮށްފައެވެ. އަދި މެސީ އެކްލަބަށް ބަދަލުވީ 50-60 މިލިއަން ޑޮލަރުގެ އަގަކަށް ކަން އޭނާ ހާމަކުރިއެވެ.
