މި ޝޯގައި ވަނީ ރާއްޖެއާއި އަދި މިނިވަންކަމާ ގުޅުން ހުރި ތަފާތު ބަސްތަކާއި، އަދި ތަސްވީރުތައް ޑްރޯން މެދުވެރިކޮށް ވައިގެ ތެރޭގައި ކުރަހާފައެވެ.
ދިރާގުން ބުނީ މި ޑްރޯން ޝޯ ކުރިއަށް ގެންގޮސްފައިވަނީ ރާއްޖޭގެ 58 ވަނަ މިނިވަން ދުވަހުގެ މުނާސަބަތުގައި އާބަންކޯ އާއި ހޯމް މިނިސްޓްރީ ގުޅިގެން ބޭއްވި މިނިވަން އުފާ ކާނިވަލް ހުޅުވުމުގެ ރަސްމިއްޔާތުގައި ކަމަށެވެ. އެގޮތުން 300 ޑްރޯން އާއެކު ބޭއްވި މި ޝޯގައި ތަފާތު ރީތި ދިވެހިވަންތަ ޑިޒައިންތައް ދައްކާލާފައިވާ ކަމަށް ދިރާގުން ބުނެއެވެ.
ދިރާގުން ބުނެފައިވަނީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި އެމަނިކުފާނުގެ އަނބިކަނބަލުން ފަޒްނާ އަހުމަދާއި ވަޒީރުންގެ މަޖިލީހުގެ މެންބަރުންނާއި ސަރުކާރުގެ އިސްވެރިންގެ އިތުރުން ކާނިވަލަށް ޒިޔާރަތްކުރި ގިނަ ފަރާތްތަކަކުން މި ޑްރޯން ޝޯ ބައްލަވާލައްވާފައިވާ ކަމަށެވެ.
ދިރާގުން އަބަދުވެސް މަސައްކަތްކުރަމުން ދަނީ ރާއްޖޭގައި ދިރިއުޅޭ ފަރާތްތަކަށް އިތުރު ފުރުސަތުތައް މަގުފަހިކޮށްދޭފަދަ ތަފާތު މުނިފޫހިފިލުވުމާއި އިޖުތިމާއީ ހަރަކާތްތައް ކުރިއަށް ގެންދިއުމަށް އެއްބާރުލުން ދިނުމަށް ކަމަށް އެ ކުންފުނިން ބުނެއެވެ.
