މިހާރު ރާއްޖެ އަށް ކުރަމުންދާ ވިއްސާރާގައި ބ. އަތޮޅުން ފެށިގެން މ. އަތޮޅާ ހަމައަށް އާއްމު ގޮތެއްގައި ގަޑިއަކު 36 މޭލާއި 42 މޭލާ ދެމެދުގެ ބާރުމިނުގައި އަދި ވިލާގަނޑުގައި 60 މޭލަށް ވައިގަދަވާނެ ކަމަށް މޫސުމާ ބެހޭ އިދާރާ (މެޓް) އިން ވަނީ ލަފާކޮށްފަ އެވެ.
ފުލުހުން "އެކްސް" ގައި މިރޭ ކުރި ޕޯސްޓެއްގައި ވަނީ މި ދުވަސްވަރަކީ ވައިގަދަ، ވިއްސާރަ ދުވަސްވަރަކަށް ވުމާއެކު، ސިނަމާލެ ބްރިޖު އަދި ހަލި މަގު (ހައިވޭ) އިން ދަތުރު ކުރާ އިރު، ތިމާ އާއި އަނެކުންގެ ސަލާމަތާއި ރައްކާތެރިކަމަށް ބަލައިގެން އުޅަނދު ދުއްވުމަށް އިލްތިމާސް ކުރާ ކަމަށެވެ.
އަދި ސައިކަލް ދުއްވާ އިރު، ކުޑަ ނަގައިގެން ނުދުއްވުމަށާއި ފަސޭހަ އިން ހަލާކުވެ ވަޔާދާ ފަދަ ކޯޓު ބޭނުން ނުކުރުމަށް ވެސް ފުލުހުން އެދެ އެވެ. އަދި ހެލްމެޓް ވެސް ވަޔާ ނުދާނެ ހެން ރަނގަޅަށް އެޅުމަށް ވެސް ފުލުހުން ވަނީ އިލްތިމާސްކޮށްފަ އެވެ.
މި އަހަރުގެ ހުޅަނގު މޫސުން ފެށުނު ކަމަށް މެޓް އޮފީހުން ބުނެފައިވަނީ މި މަހުގެ 10 ގަ އެވެ. އޭގެ ފަހުން ރާއްޖޭގެ އެކި ހިސާބުތަކަށް ދަނީ ގަދަވަޔާއެކު ބޯކޮށް ވާރޭވެހެމުންނެވެ. އެކަމުގެ ސަބަބުން މާލެއާއި ރާއްޖޭގެ އެކި ރަށްރަށުގައި ފެންބޮޑުވުމުގެ އެކި ހާދިސާތައް ވަނީ ހިނގާފަ އެވެ.
ގަދަ ވައިގެ އަސަރު މާލެއަށް ވެސް ކުރަމުން އަންނައިރު، ބައެއް ގަސްތަކުގެ ގޮފިތައް ވެއްޓުމުގެ އެކި ހާދިސާތައް ދަނީ ހިނގަމުންނެވެ.
އެގޮތުން، ވެލާނާގެ ކުރިމަތީގައި ހުރި ގަހެއް ވެއްޓި، ދުއްވާފައި ދިޔަ ސައިކަލަކަށާއި ޕާކުކޮށްފައި ހުރި ސައިކަލަކަށް ގެއްލުން ލިބިފައިވާ ކަމަށް މާލޭ ސިޓީ ކައުންސިލުން ބުނެފައިވެ އެވެ.
