ރާއްޖެ ޓީވީއަށް މައުލޫމާތު ދެއްވަމުން އެެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު ވިދާޅުވީ އެ ކުންފުނިން މިހާރު އެެންމެ ބޮޑަށް މަސައްކަތް ކުރަމުން އަންނަނީ ފެނުގެ ސަޕްލައި އިތުރުކުރުމަށް ކަމަށެވެ.
ހުޅުމާލޭގައި ދޭތެރެ ދޭތެރެއިން ދިމާވާ ފެނުގެ ދަތިކަމަށް ވަރަށް އަވަހަށް ހައްލު ލިބިގެންދާނެކަން ފާހަގަކުރައްވާ ޝާހު ވިދާޅުވެފައިވަނީ މިހާރު ކުރިއަށް ދަނީ 3،000 ޓަނުގެ ފެން ޕްލާންޓުގެ އެންމެފަހުގެ މަސައްކަތްތައް ކަމަށެވެ.
އުތުރު ހުޅުމާލެ (ދެވަނަ ފިޔަވަހި) ގައި އާބާދީ އިތުރުވަމުން އަންނައިރު ފެނަށް ބާރު ބޮޑުވެ ހިދުމަތް މެދުކެނޑުނަނުދިނުމަށް ކުރިއަށް އޮތްތަނުގައި ހުޅުމާލޭގައި އިތުރު އެކްސްޓެންޝަންތައް ގާއިމުކުރާނެ ކަމަށް ޝާހު ވިދާޅުވިއެވެ. ޝާހު ވިދާޅުވީ މާލެ އާއި އެހެނިހެން ސަރަހައްދުތަކުގައި ފެނަށް ނުޖެހި އުޅެވޭނެ ފަދަ އިންތިޒާމުތަކެއް ހަމަޖެއްސުމަށް މަސައްކަތް ކުރަމުން އަންނަ ކަމަށެވެ.
ރާއްޖޭގެ އެކި ހިސާބުތަކުގައި އެމްޑަބްލިއުއެސްސީގެ މުހިންމު މަސައްކަތްތަކެއް ކުރިއަށްދާކަން ފާހަގަކުރައްވާ ޝާހު ވިދާޅުވި ގޮތުގައި އެހެން އެއްވެސް ސަރުކާރަކުން ނުދޭވަރަށް އިސްކަންދީގެން މި ސަރުކާރުން ފެނާއި ނަރުދަމާގެ މަސައްކަތްތައް ކޮށްފައިވާ ކަމަށާާއި އެކަމުގެ ނަތީޖާ ރަނގަޅު ކަމުގައެވެ.
