މުއިއްޒު މިހެން ވިދާޅުވީ ރިޔާސީ އިންތިހާބުގެ ކެމްޕޭނަށް މިއަދު ހދ.ހަނިމާދުއަށް ވަޑައިގެން އެރަށުގެ ޕީޕީއެމް ސަޕޯޓަރުންނާއިއެކު ބޭއްވެވި ޖަގަހަ ބައްދަލުވުމެއްގައެވެ.
މުއިއްޒު ވިދާޅުވީ އެންމެ ބޮޑަށް މަސައްކަތް ކުރައްވާނީ ކުރީގެ ރައީސް އަބުދުﷲ ޔާމީން މިނިވަން ކުރަން ކަމަށެވެ. މިހާތަނަށް ކުރެވުނު އެއްވެސް މަސައްކަތަކުން ރައީސް ޔާމީން މިނިވަން ކުރުމުގެ މަސައްކަތުގައި ކާމިޔާބަކާއި ހަމައަށް ނުދެވުނު ނަމަވެސް ކުރިއަށް އޮތް ރިޔާސީ އިންތިހާބު ކާމިޔާބުކޮށް، ރައީސް ޔާމީން މިނިވަން ކުރުމުގައި ބައިވެރިވެ ވަޑައިގަންނަވަން މުއިއްޒު އެދިވަޑައިގެންނެވިއެވެ.
ހިނގަމުންދާ ތަރައްގީގެ އެއްވެސް ކަމެއް ނުހުއްޓުވާނެ ކަމުގެ ޔަގީން ކަމާއިއެކު މުއިއްޒު ވިދާޅުވީ ހަނިމާދޫ އެއާޕޯޓް ތަރައްގީ ކުރުމަށް މިހާރު ކުރަމުން ގެންދާ މަސައްކަތަކީ ރަނގަޅަށް ކުރިއަށް ގެންދެވިއްޖެނަމަ ރަށަށް ވަރަށް ފައިދާ ވާނެ މަޝްރޫއެއް ކަމަށެވެ.
މުއިއްޒު ބޮޑުތިލަދުންމައްޗަށް ފެއްޓެވި ދަތުރުފުޅުގައި މިއަދު ފުރަތަމަ ވަޑައިގެންނެވީ ހަނިމާދުއަށެވެ. އެއަށްފަހު ނޮޅިވަރަމް އަދި ކުޅުދުއްފުއްޓަށް ވަޑައިގަންނަވާނެއެވެ. މިރޭ ކުޅުދުއްފުށީގައި ބޮޑު ޖަލްސާއެއް ބޭއްވުމަށް ވަނީ ހަމަޖެހިފައެވެ.
