ކުރެވޭނެކަމެއްނެތި އަދި ބުނެވޭނެ އިތުރު އެއްޗެއް ނެތިފައި ތާބިޝް ގޮތް ހުސްވެ، ކަރުއެލުވާލި އެވެ.
"އެއީ މާޒީ.. އެ އޮތް ގޮތަށް ބާއްވާ..! ކޮނެގެން ނެގުމުގެ ބޭނުމެއް ނެތް..!" ހިމޭން ވަގުތުކޮޅަކަށްފަހު ފިޒާ ބުންޏެވެ.
ވެއްޓުމަށް ތައްޔާރުވި ކަރުނަތިކި ތާބިޝް ފޮހެލީ ނުހަނު ސިއްރުންނެވެ. އިތުރު އެއްވެސް އެއްޗެއް ނުބުނެ ކާރރު ދުއްވާލީ ދާންވީ މިސްރާބެއް އެނގޭތީއެއް ނޫނެވެ. ކާރުބާރުބޮޑު ނުވާނެހެން ހީވާ މަގުތަކުން ދުއްވުމަށްފަހު ތާބިޝް ނިންމީ ސުވާލުކުރާށެވެ. ސުވާލެއް ނެތި، ބޭނުންވާ ޖަވާބު ނުލިބޭނެކަން ޔަގީންވީ އެވެ.
"ދާން ބޭނުންވަނީ ކޮންތާކަށް..؟" އެތައް ގޮތަކަށް ވިސްނުމަށްފަހު ތާބިޝްގެ ސުވާލު ހުށަހެޅި އެވެ.
"ދާންބޭނުން ތާކަށް ދިއުމަށް މާކުރިން ތާބިޝްއޮތީ އަހަރެން ދޫކޮށްލާފައި.. މިތަނަށް ކާރު ހުއްޓާ..!" ވާނުވާ ނޭގިފައި ތާބިޝް ކުއްލިޔަކަށް ކާރު ހުއްޓި އެވެ. ފިޒާގެ ޖުމުލައިގައި ފޮރުވިފައި އޮތް މާނައެއް ހަގީގަތުގައިވެސް ތާބިޝްއަށް ނަގައއިނުގަނެވުނީ އެވެ.
"ފިޒާ ގެއަށް ގެންގޮސްދޭންވެގެންނޭ ކާރަށް އެރުވީ.." މަޑުމަޑުން ތާބިޝް ބުންޏެވެ. ތާބިޝްގެ ޖުމުލަ ރަގަޅަށް ނުނިމެނީސް ފިޒާ، ދޮރުހުޅުވާފައި އެއްފައި ބޭރަށް ލައިފި އެވެ.
"މިހިސާބަށް ގެނެސްދިނީތީވެސް ވަރަށް ބޮޑަށް ސުކުރިއްޔާ.. އަހަރެން ފަދަ އަންހެންކުއްޖަކު ކާރަށް އަރުވައިގެން، ތާބިޝްގެ އަބުރާއި އިއްޒަތަށް ކުޑަވެސް ލޮޅުމެއް އަންނާކަށް އަހަރެން ބޭނުމެއް ނޫން.. އެފަދަ ބަދުނާމެއްގައި ތާބިޝްކަހަލަ އަބުރުވެރިން ބެދޭކަށް ނުވާނެ..!" ރިހުމުން ފުރިފައިވާ ހިނިތުންވުމަކާއެކު ފިޒާ ބުނެލި އެވެ.
ތާބިޝްއަށް އެންމެ ލަފްޒެއްވެސް ނުބުނެވެނީސް ކާރުގެ ތެރެއިން ފިޒާ ނިކުމެ ދޮރުލައްޕައިފި އެވެ. ބިއްލޫރިގަނޑު ތިރިކޮށްލާފައި ފިޒާއަށް ގޮވާލުމުގެ ކުރީން ޓެކްސީއެއްގައި ފިޒާ ނައްޓާލައިފި އެވެ. ލޯކުރިމަތީން ޓެކްސީ ގެއްލެންދެން ތާބިޝް ބަލަހައްޓައިގެން އިނެވެ.
"އަނެއްކާވެސް ފިޒާ އަހަންނަށް ގެއްލުނީ..!" ބޮލުގެ އިސްތަށިގަނޑުގައި ދެފަރާތުން ހިފައި ބާރުކޮށްލަމުން ތާބިޝް ބުނެލި އެވެ.
.....................
ޓެކްސީން ފޭބިގޮތަށް ދުވަމުން ފިޒާ ވަނީ ގޭތެރެއަށެވެ. އެއްވެސް މީހަކާ ބައްދަލުކުރުމެއްނެތި ދުވެފައިގޮސް ކޮޓަރިއަށް ވަދެ، ދޮރުލައްޕައި ތަޅުލައިފި އެވެ.
"ތާބިޝް، ކީއްވެ..؟ ކީއްވެ އެހެން ހެދީ..؟ ތާބިޝްގެ ހަޔާތުން އަމިއްލައަށް އަހަރެން ބޭރުކޮށްފައި މިހާރު ތިހެން ތިއުޅެނީ ކީއްވެ..؟ އަލުން ތާބިޝްގެ ހަޔާތަށް އަހަރެން ގެންދާން މަސައްކަތް ތިކުރަނީ ކީއްވެ..؟ އަހަރެންގެ ހަޔާތަށް ތާބިޝް ތިއައީ ކީއްވެ..؟ ކީއްވެ ތާބިޝް...؟ ކީއްވެ..؟"
އެނދުކައިރިއަށް ވެއްޓި އޮވެ، ފިޒާ ރޮމުންގެންދިޔައީ އަމިއްލަ ހިތުގައި ރިހެމުންދިޔަ އެތައް ސުވާލަކކަށް ތަސައްލީ ލިބޭތޯ އެވެ. ގިސްލާ ރޮމުން އަމިއްލަ ހާލާއިމެދު އެތައް ކަރުނައެއް ފިޒާ އެއަޅަނީ އޭނާގެ ކޮންޓްރޯލުގައި އަމިއްލަ ތަގުދީރުގެ މިސްރާބެއއް ނެތީތީ އެވެ.
ފިޒާ ދުވެފައި އައިސް ކޮޓަރިއަށް ވަންއިރު އަޝްކާ އުޅެނީ ބަދިގޭގަ އެވެ. އެއީ ގޭގައި ވާލިދްވެސް ނެތް ވަގުތެކެވެ. ގެއަށް އައީ ފިޒާކަން އަޝްކާ ޔަގީންކުރި އެވެ. ނަމަވެސް ދުވެފައި ކޮޓަރިއަށްގޮސް ދޮރު ތަޅުލިއަޑު އިވުމަކީ އަޝްކާގެ ސިކުނޑީގައި ސުވާލުއުފެދުނު ކަމެކެވެ. ކައްކަން ހުރި ރިހަކޮޅުގެ އުނދުން ނިވާލާފައި އަޝްކާ ދުވެފައި އައީ ފިޒާގެ ކޮޓަރިއަށެވެ. ކަންކަން ރަގަޅު ނޫންކަން އަޝްކާއަށް ޔަގީންވީ އެވެ.
"ފިޒާ.. ދަރިފުޅާ... ފިޒާ ދޮރުހުޅުވަބަލަ..! ވީގޮތެއް ބުނެބަލަ..! ދޮރު ހުޅުވަބަލަ..! އާރ ޔޫ އޯކޭ ދަރިފުޅާ..؟ ދޮރުހުޅުވާލަބަލަ ދަރިފުޅާ..!"
ހާސްވެ، ކަންބޮޑުވެފައި އަޝްކާ އާދޭސްކުރަމުންދިޔައީ ފިޒާ ދޮރުހުޅުވުމަށެވެ. ފިޒާ މަސައްކަތްކުރަނީ ތާބިޝްއާއެކުކަން އަޝްކާއަށް އެނގެ އެވެ. އެކަމާއި އެއްޗެއް ނުބުންޏަސް، އެއީ އެއްގޮތަކަށްވެސް އަޝްކާ ބޭނުންވާ ގޮތެއް ނޫނެވެ. ނަމަވެސް ފިޒާއަށް އޮތް އިތުބާރެއްގެ ބޮޑުކަމުން އެކަމާއި އަޅާނުލާ ހުރީ އެވެ.
"ދަރިފުޅާ ފިޒާ، ޕްލީޒް ދޮރުހުޅުވާލަބަލަ.. ދައްތަ ބިރުނުގަންނަވާ ޕްލީޒް.. ވީގޮތެއް ދައްތަ ކައިރީގައި ބުނެލަބަލަ.. ޕްލީޒް ދަރިފުޅާ... ދޮރުހުޅުވަބަލަ..!" އަޝްކާއަށް ރޮވެނީކަން އޭނާގެ އަޑުން ސާފުކޮށް އެގެ އެވެ.
މަޑުމަޑުން ދޮރުގެ ތަޅު އަންލޮކް ކޮށްފިކަން ޔަގީންވުމާއެކު އަވަސްއަވަހަށް އަޝްކާ ކޮޓަރިތެރެއަށް ދެމިގެންފި އެވެ. އެއްވެސް އެއްޗެއް ނުބުނެ ފިޒާގެ ކުރިމަތީގައި ހުއްޓި ވަރަށް ރަގަޅަށް މޫނަށް ބަލައިލި އެވެ.
"އަސްލު... މިއަދު ވަރަށް ވަރުބަލި.. އެހެންވެ ތަންކޮޅެއް އަވަހަށް ގެއަށް މި އައީ.. ނިދާލީމައި ބޮލުގައި ރިހުންވެސް ލުއިވެދާނެ.. އެހެންވެ ބަދިގެއަށް ނުގޮސް، އައިގޮތަށް ކޮޓަރިއަށް ވަނީ.. ފެންވަރާލައިގެން ނިދާލަން ބޭނުންވާތީ.." އިސްޖަހައިގެން ހުރެ ލަސްލަހުން ފިޒާ ޖުމުލަތައް ގުޅުވަމުންދިޔަ އެވެ.
"ފިޒާ، މިހާރު ދައްތައަށް ދޮގުހަދާ ހިސާބަށްވެސް ދިޔައީތަ؟" ފިޒާ ހެދީ ދޮގެއްކަން އެނގިހުރެ، ހަށަން ބަނދެލާފައި އަޝްކާ ބުނެލި އެވެ.
"އެހެނެއް ނޫން ދައްތާ..! ސީރިއަސްލީ ހަމަ އަހަރެން ވަރަށް ވަރުބަލި!" ވަރުބަލިކަން މޫނުމަތީން ދައްކާލަމުނން ފިޒާ ބުންޏެވެ.
ކުރިއަށް ފިޔަވަޅެއް އަޅައި ފިޒާ މޫނުގެ ދެފަރާތުން އަޝްކާ ހިފަހައްޓާލި އެވެ. ހަތަރުކަޅި ހަމަކުރާން ފިޒާއަށް މަޖުބޫރުވީ އެވެ. ލޭކޮޅެއް ފަދައިން ރަތްވެފައިވާ ދެ ލޮލަށް އަޝްކާ ބަލައިލީ އަސަރާއެކު އެވެ.
"ދައްތައަށް އެއްވެސް ކަމެއް ސިއްރު ނުކުރެވޭނެކަން އިނގޭއިރު، ދޮގު ހަދަން މަސައްކަތްނުކުރައްޗޭ..! ތިހުރިހައި ކަމެއް ގުޅެނީ ތާބިޝްއާ..! ވީގޮތެއް ދައްތައަށް ކިޔައިދީ.. ތާބީޝްހެދިގޮތެއް ދައްތައަށް ބުނެދީ..!"
ލޯތްބާއެކު އަޝްކާ ވާހަކަދައްކަމުން ދިޔައީ ފިޒާގެ އެ ހާލަތު ދެކެން އަޝްކާއަށް ކެތް ނުވާތީ އެވެ. ފިޒާގެ ލޮލުން ކޯތާފަތަށް ފައިބައިގަތް ކަރުނައަކީ އަޝްކާގެ ލޭ ކައްކުވާލި އަނގުރު އަލިފާނާށް ބަދަލުވެގެން ދިޔައީ ހިނދުކޮޅެއްގެ ތެރޭގައެވެ. ފިޒާގެ ދެއަތުގައި ހިފައި ކައިރިކޮށް، ނުހަނު ލޯބިން ބައްދާލައި ބުރަކަށީގައި ފިރުމާލި އެވެ.
"ދައްތާ... ކީއްވެތަ ތާބިޝް އެހެން ހެދީ..؟ ތާބިޝް އަހަރެން ދޫކޮށްލީ ކީއްވެތަ..؟ އެއީ އަހަރެންގެ ކުށެށް ނޫންކަން ތާބިޝް ގަބޫލުކުރޭ.. އެކަމަކު އަހަންނަށް ތާބިޝް އިތުބާރެއް ނުކުރި.. އަހަރުމެން ދެމީހުންގެ ވަކިވުމަށްފަހު، އަހަރެން އުޅުނު ހާލާއި އެޅި ކަރުނަ ފެންނާނީ ދައްތައަށް.. ހުރިހައިކަމެއް ހަނދާންނައްތާލާފައި ދިރިއުޅުމައިގެން އަހަރެން ކުރިއަށް ދާން މަސައްކަތްފެށީމައި އަނެއްކާ، ތާބިޝްގެ ކަންތައްގަނޑު މިޖެހުނީ.. ހުރިހައި ކަމެއް އެފުށްމިފުށަށް ޖެހިގެން މިދަނީ ތާބިޝްގެ ސަބަބުން.. އޮފީހަށް ދިއަޔަސް، ރަގަޅަށް މަސައްކަތްކުރުމުގެ ފުރުސަތެއް ނުލިބޭ.. ހީވާކަހަލަ ތާބިޝްގެ އޮތީ އެންމެ އަޒުމެކޭ..! އެކަމަކު އަލުން އެ ވޭން އުފުލާނެ ހިތްވަރެއް އަހަރެންގެ ގަޔަކު ނެތް..!"
ފިޒާ ރޮމުންދިޔައީ އަޝްކާގެ ކޮނޑުގައި ބޯއަޅައިގެން އޮވެ އެވެ. ބުރަކަށީގައި ފިރުމަމުން، ލޮބުވެތި ބަސްތަކުނން ފިޒާއަށް ލުއިކަން ހޯދައިދެވޭތޯ އަޝްކާ މަސައްކަތްކުރި އެވެ.
"ދައްތާ.. ތާބިޝްބުނީ، އަހަރެންދެކެ ވަރަށް ލޯބިވެޔޭ..! އެހެންކަމަށްވަންޏާއި އެހުރިހައި ކަމެއް އެގޮތަށް އެ ހިނގީ ކީއްވެ..؟ އަހަރެންގެ ހިތުން ތާބިޝް ނުނެރެވިގެން މިއުޅެނީ ކީއްވެތަ ދައްތާ..؟ މިހުރިހައި ކަމެއްގައި އޮތީ އަހަރެންގެ ކުށް..! މިއީ އަހަރެންގެ ކުށް، އެހެންނޫންނަމަ ތާބިޝް ހަނދާންނައްތާލެވުނީސް..! އެކަމަކު ފިނޑިއެއް ފަދައިން ގެއަށް އައިސް އަހަރެން މިއޮންނަނީ ރޯން..! ތާބިޝްމަތިން ހަނދާން ނައްތާނުލެވިގެން މިއުޅެނީ އަހަރެންގެ ކުށުން..!" ފިޒާގެ އަމިއްލަ ނަފުސު ކުށްވެރިކޮށް، ރޮމމުންދިޔައީ އޭނާގެ ނަސީބާއިމެދު ޝަކުވާ އޮތީމަ އެވެ.
"ޝްޝްޝްޝ... ހަމަޖެހިބަލަ..! ފިޒާގެ އެއްވެސް ކުށެށް ނެތް..! ހަނދާންކުރާތީ، ހިނގާދިޔަ އެއްވެސް ކަމެއްގައި ފިޒާގެ އެއްވެސް ކުށެށް ނެތް.. އަމިއްލަ ނަފުސު ކުށްވެރިކުރުމުގައި ހައްދެއް އޮންނާންވާނެ ދަރިފުޅާ..! ލޯބިވުމަކީ ކުށެށް ނޫން.. ތާބިޝްދެކެ ފިޒާވީ، ހަގީގީލޯބި.. އެކަމަކު ފިޒާގެ ލޯބި ތާބިޝްއަށް ހައްގެއް ނޫން.. ދައްތަ ބުނިންދޯ ތާބިޝްއާއި ގާތްނުވައްޗޭ..! ރިހުމާއި ވޭނާއި ކަރުނަ ނޫން އެހެން އެއްވެސް އެއްޗެއް ތާބިޝްގެ ކިބައިން ފިޒާއަކަށް ނުލިބޭނެ.. ފިޒާގެ ކަރުނަ ދެކޭކަށް އަހަރުމެންނަށް ފަސޭހައެއް ނޫން... އެއީ ކެތްކުރެވޭވަރު ކަމެއް ނޫން.. ތިގޮތަށް ބަލިކަށިވެ، އަމިއަލް ހާލައިގެން ހިތާމަކުރުމަކީ އަހަރެން ބޭނުންވާ ގޮތެއް ނޫން.. ފިޒާއަކީ ވަރަށް ހިތްވަރުގަދަ ކުއްޖެއް..!" އަޝްކާ ރޮމުންވެސް ފިޒާއަށް ހިތްވަރުދެވޭތޯ މަސައްކަތްކުރި އެވެ.
"ތާބިޝްއާއި ގާތްނުވާން އަހަރެން މަސައްކަތްކުރާނަން.." މަޑުމަޑުން ފިޒާ ބުނެލި އެވެ.
"ފިރިހެން ދަރިންނާއި ކައިވެނިކޮށްގެން ގެއަށް ގެންދާ، އަންހެން ކުދިންނަށް އޯގާތެރިކަމާއި އިހްތިރާމް ނެތް ހިޔާވައްސެއްގައި އެކުދިން ދިރިއުޅެންޖެހޭ ހާލު ދައްތައަށް ނޭގިދާނެ.. އެކަމަކު ދައްތާއެކު އުޅުނު ކިތަންމެ ކުއްޖެއްގެ ދިރިއުޅުން ހަލާކުވެގެން ދިޔައީ އެމީހުންގެ މައިދައިތައިންގެ ސަބަބުން..! ވާލިދްއާއި ކައިވެނިކުރީއްސުރެން ދައްތަ މިއުޅެނީ މުޅިން ވަކިން.. މީހަކު ހިތްހަމަނުޖެހިދާނެތީ ނުވަތަ ބައެއްގެ ބުރައާއި އެމީހުންގެ ދޮގު އިލްޒާމްތަށް ތަހަންމަލް ކުރާކަށް ދައްތައަކަށް ނުޖެހޭ.. ކައިވެނިކޮށްގެން އަނބިމީހާ ތިމާގެ މައިންބަފައިންނާއި އާއިލާގެ އެހެން މީހުންގެ ކުރިމައްޗަށް ގެންދަން ޖެހޭނީ އެ ފިރިއެއްގެ ނުވަތަ ފިރިހެން ދަރިއެއްގެ ފުރިހަމަ ވާޖިބު އަދާކުރެވޭނެ މީހުން..!" އަޝްކާގެ ވާހަކަ ހުއްޓާލާފައި ފިޒާގެ މޫނަށް ބަލަހައްޓައިގެން އިރުކޮޅަކު ހުއްޓެވެ.
"ދަރިއެއްގެ ހައްގުތަކާއި ބޭބެއެއްގެ ހައްގުތަކާއި ފިރިއެއްގެ ހައްގުތަކަކީ މުޅިން ތަފާތު ދާއިރާތަކެއް.. އެހުރިހައި ކަމެއްގެ ފުރިހަމަ ޒިންމާ ފިރިމީހާ ނަގާނަމަ، އަނބިންގެ ހައްގު މަގާމް އަނބިންނަށް، މައިދައިތައިންގެ ކުރިމަތީގައިވެސް ލިބުނީސް..! އެފަދަ ފިނޑި ފިރިހެނުން އާއިލާގެ ޒިންމާ އުފުލަން އުޅޭނެކަމެއް ނެތް.. އަލަތު ކައިވެންޏަށްފަހު، ލޯބިން އަޅާބިންގަލުގެ މަތީގައި ދިރިއުޅުން އާރާސްތުކޮށް ނުނިމެނީސް ލޯބީގެ އިމާރާތް ފަނާވެގެން ބިމާއި ހަމަވަނީ ގިނަފަހަރު މައިދައިތައިންގެ ސަބަބުން.. އެމީހުންނަށް އެފުރުސަތު ދެނނީ ފިރިހެން ދަރީން.. ފިރިމީހާއަކަށް ނޭގެ، ކައިވެންޏަށްފަހު އަންހެން ކުއްޖާ އަންނަނީ އޭނާގެ މުޅި އުމުރު އެކުގައި ދިރިއުޅުނު އާއިލާ ދޫކޮށް، އޭނާގެ މުޅި ދިރިއުޅުން ދޫކޮށްލާފައިކަމެއް.. ކުއްލިޔަކަށް މުޅިން އައު ބައެއްގެ ތެރެއަށް އައިސް، މުޅިން އައު ދިރިއުޅުމެއް އުޅެންފަށަނީ ނުވެސް ދަންނަ ބައެއްގެ ތެރެއިން އޭނާއަށް ހައްގުވާ މިންވަރު ކަށަވަރުކުރަން.. އެކަމަކު ހައްގުވާ މިންވަރު އެއީ ވުޖޫދުގައިވާ އެއްޗަކަށްވެސް ނުވޭ.. އިހްތިރާމެއް އިއްޒަތެއް އޯގާތެރިކަމެއް، އަގުވަޒަންކުރުމެއް ނެތް ދިރިއުޅުމެއްގައި ތެޅިތެޅި މުޅި މީހާގެ ހަޔާތް ނިމިގެންދަނީ އެހެން ބައެއްގެ ހިތްހަމަޖައްސައިދެވޭތޯ ތެޅިތެޅި ތިއްބައި..! އެންމެން ހިތްހަމަޖައްސައިދީގެން މުޅި ދުނިޔެ ހޭދަކުރެވޭނެކަމަށް ދެކެމަކީ މޮޔަކަމެއް..!" އަޝްކާގެ ދުނިޔެވީ ތަޖުރިބާއިން އޭނާއަށް އެނގިފައި އޮތް މިންވަރެއް ފިޒާއާއި ހިއްސާކުރި އެވެ.
"ތާބިޝްއާއި ދުރުން އުޅެވޭތޯ އަހަރެން މަސައްކަތްކުރާނަން.. މި ވަޒީފާ އަހަރެން ދޫކޮށްލާނަން.. ތާބިޝްއާއި ކުރިމަތިލާންޖެހޭ ހުރިހައި ކަމަކާއި އަހަރެން ދުރުވެގަންނާނަން.. މި ވަޒީފާގައި އުޅޭނަމަ ތާބީޝްއާއި ދުރުގައި އުޅުމަކީ ފަސޭހަކަމަކަށް ނުވާނެ..!" ޔަގީންކަމާއެކު ފިޒާ ބުނެލި އެވެ. އަޝްކާއަށް އެއްޗެއް ނުބުނެވެނީސް، ގޭގެ ބެލް އަޅައިލި އަޑު އިވިއްޖެ އެވެ.
"ދައްތަ ބަލާލާނަން އައީ ކާކުތޯ؟" ފިޒާގެ ބުރަކަށީގައި ފިރުމާލާފައި އަޝްކާ ބުންޏެވެ. ހިނިތުންވުމަކާއެކު ފިޒާއަށް ބަލައިލާފައި ދޮރުހުޅުވަން އަޝްކާ ހިނގައްޖެ އެވެ.
'ތާބިޝް މުހައްމަދު އަހްސަން... އަހަންނަށް އިނގޭ ތިއީ އަހަރެންގެ ފިރިމީހާކަން.. އެކަން އަހަރެން ގަބޫލުވެސް ކުރަން..! ތާބިޝް އަހަރެން ދެކެ ލޯބިވާކަމަށްވެސް އަހަރެން ގަބޫލުކުރަން.. އެކަމަކު ތާބިޝް އަހަންނަށް ދިން ޒަހަމްތަކަށް އަދިވެސް ފަރުވާއެއް ނުލިބޭ.. ރޯ ފާރުގަނޑުތަކެއްގެ ގޮތުގައި އެ ޒަހަމްތަކުން އަދިވެސް އަހަންނަށް ލިބެނީ ގަދަ ރިހުމާއި ވޭން..! އެއީ ދުވަހަކުވެސް ފަސޭހަވުމެއް ނެތް ޒަހަމްތަކެއް.. އަހަންނަށް ތާބިޝް ހަދައިލިގޮތް ދުވަހަކުވެސް ހަނދާން ނުނެތޭނެ..! އެ ކުށަށް ދުވަހަކުވެސް ތާބިޝްއަށް އަހަރެން މައާފެއް ނުކުރާނަން..! އަހަރުމެންގެ މި ހަޔާތުގައި ތާބިޝް ލެއްވި ޒަހަމްގެ ހައްގުގައިވެސް މައާފެއް ނުދޭނަން..!" ހަށިގަނޑު ސިދާކޮށް ދަތްދޮޅި އުފުލާލާފައި ފިޒާ ބުނެލީ އަމިއްލަ ނަފުސަސް އިތުބާރު ވަރުގަދަކުރަމުންނެވެ.
........................
ތާބިޝް ގެއަށް އައީ އިޝްގުގައި ދީވާނާވެފައިވާ މީހަކުފަދައިން، މާޔޫސްކަމާއެކު ފިޔަވަޅުތައް ދަމަމުންނެވެ. ފުރަތަމަ ފެނުނު ސޯފާ މައްޗަށް ތާބިޝް ވެއްޓިގަތެވެ. ހިފެހެއްޓުމެއް ނެތް ކަރުނަ އޭނާގެ ދެ ލޮލުން ފައިބަމުންދިޔައީ އަމިއްލަ ހާލާއިމެދުގައި މޮޔަހީވާތީ އެވެ.
"އައި ޑޯންޓް ޑިޒަރވް ހަރ" ނުބައި ވަސްވާސްތަކުން ތާބިޝްގެ ސިކުނޑި ތަގައްޔަރުވަމުންދިޔަ އެވެ. ކަމުގެ އޮތް އެންމެ ނުރަގަޅު ހުރިހައި ގޮތެއް ތާބިޝްގެ ހިތާއި ސިކުނޑީގައި އެނބުރެން ފަށައިފި އެވެ.
"ތާބިޝް" ކަޔާންގެ އަޑާއެކު ތާބިޝްއަށް ހަމަބިމަށް ފޭބިއްޖެ އެވެ.
"ހޫމްމްމްމ" ދެ ލޯ މަރައިލަމުން ޝައުގުވެރިކަމެއް ނެތް ޖަވާބެއް ދިނެވެ.
"އަހަރެން އޭނާ ދުށިން..!" ޔަގީންކަމާއެކު ކަޔާން ބުނެލި އެވެ. ދެ ލޯ ބޮޑުކޮށްލާފައި ތާބިޝް ތެޅިގަތެވެ.
"ކޮންއިރަކު؟" ތާބިޝް ސުވާލުކުރި އެވެ.
"އޮފީހުން.. އަހަރެންވެސް ހުރިން، ތާބިޝްއާއި ލަވާންޔާގެ..." ކަޔާންގެ ޖުމުލަ އޭނާ ނުނިންމީ ގަސްތުގަ އެވެ. ތާބިޝްގެ ބޮލުން އިޝާރާތްކޮށް އާއެކޭ ބުންޏެވެ.
"އެހެންވީމަ، އަހަރެން އޭނާގެ ދިރިއުޅުން ފުނޑުފުނޑުކޮށްލި ގޮތް، ދެކެން އެތަނުގައި މިއަދުވެސް ހުރިން ދޯ" ރިހުމުން ފުރިފައިވާ ހިނިތުންވުމަކާއެކު ތާބިޝް ބުނެލި އެވެ.
"ތާބިޝް... އިޓް ވޯޒް އަ މިސްއަންޑަސްޓޭންޑިންގ..! އޭގެ ހަގީގަތް ފިޒާއަށް ކިޔައިނުދޭންވެގެން ތިއުޅެނީ ކިއްވެކަމެއް އަހަންނަކަށް ނުވިސްނޭ..!" ހާސްކަމާއެކު ކަޔާން ބުންޏެވެ. ޖަވާބުގައި މަލާމާތުގެ ހިނިގަނޑަކުން ތާބިޝް ޖަވާބުދިނީ އެކަމަށް ކަޔާން ތައްޔާރުވެގެން ހުއްޓަ އެވެ.
"މިސްއަންޑަސްޓޭންޑިންގ..؟ ރިއަލީ ކަޔާން..!؟ އަހަރެން އޭނާ ގާތުގައި ބުނާނީ ކީކޭ..؟ އެއީ އަހަރުމެން ދެމީހުންގެ ދެމެދުގައި އޮތް މިސްއަންޑަސްޓޭޑިންގއެކޭތަ؟ އަހަންނަކީ އަމިއްލަ އެދުން ނޫން އެހެން އެއްޗެއް ދަންނަ މީހެއް ނޫނޭތަ؟ މައުސޫމު އަންހެންކުއްޖެއްގެ ހަޔާތް އަހަރެންގެ ދެއަތުން ބަރުބާދުކޮށްލީ އަހަރެންގެ ޒިންމާއަދާކުރާނެ ހިތްވަރު އަހަރެންގެ ކިބައިގައި ނެތީމައޭތަ ބުނަންވީ..؟ ކަޔާން ބުނެބަލަ އަހަރެން ބުނަންވީ އެއްޗެއް..!" ޗޮކެއް ކަނޑާލާފައި ސޯފާގެ މައްޗަށް އަނެއްކާވެސް ތާބިޝް ޖެހިގަތެވެ. ދެފަރާތަކަށް ޔަކާން ބޯހޫރާލީ ބުނަން އޮތްއެތި ބޮޑުކަމުންނެވެ.
"ތާބިޝް.." ތާބިޝްގެ ސަމާލުކަން ހޯދުމަށްފަހު އިރުކޮޅަކު ކަޔާން މަޑުކޮށްލި އެވެ.
"އޭނާ ވަރިކުރޭ.. ބެދިފައި ތި އޮތްމަޅިން އޭނާ ނެރި މިނިވަންކުރޭ..! ވަރިކުރުން ނޫން އެހެން ގޮތެއް ނެތް!" ކަޔާންގެ ޖުމުލަ ފުރިހަމަކޮށް ނިމުނުއިރު ތާބިޝްގެ ދުނިޔެ ފުނޑުފުނޑުވެގެން އޭނާގެ ފައިބުޑަށް ވެއްޓިއްޖެ އެވެ. (ނުނިމޭ)
