އެމްޑީޕީގެ ރިޔާސީ ކެންޑިޑޭޓުގެ ހައިސިއްޔަތުން އަރިއަތޮޅުގެ ރަށްތަކަށް ފެއްޓެވި ކެމްޕެއިން ދަތުރުފުޅުގައި މިއަދު ހެނދުނު އއ. ރަސްދޫއަށް ވަޑަައިގެން އެ ރަށުގެ ސަޕޯޓަރުންނާ ބައްދަލުކުރައްވާ ރައީސް ވިދާޅުވީ ކިތަންމެ ހިޔާލުތަފާތުވިޔަސް ކަމެއް ކުރާނީ އެ އޮންނަ އުސޫލުގެ ތެރެއިން ކަމަށެވެ. ޝަރުއީ ދާއިރާގެ ތެރެއަަށް އަތް ނުބާނާނެކަން ފާހަގަކުރައްވާ ރައީސް ވިދާޅުވެފައިވަނީ މިނިވަން ކަމާ އެކު، ޖުޑިޝަރީ ހިންގުމުގެ ބާރު ވޭތުވެދިޔަ ފަސް އަހަރު ދުވަހުގެ ތެރޭގައި ފެނިގެން ގޮސްފައިވާނެ ކަމަށެވެ.
ރައީސް ވިދާޅުވި ގޮތުގައި ވާދަވެރިން އެންމެ ކަންބޮޑުވާ އެއް ކަމަކީ އެ ފަރާތްތަކުގެ އޭރުގެ ލީޑަރުގެ މައްސަލަ ކަމުގައެވެ. ރައީސް ޔާމީން ޖަލުގައި އިންނަވަން ޖެހުނު ޖެހުން އެއީ ވާދަވެރިންގެ ކަންބޮޑުވުމެއް ކަމަށް ރައީސް ވިދާޅުވިއެވެ.
ރައީސް ޔާމީނުގެ ޝަރީއަތުގެ ތެރެއަށް އަތް ބާނައި، ނުފޫޒު ފޯރުވަން މަޖުބޫރުނުކުރުމަށް ވާދަވެރިންނަށް ރައީސް އިލްތިމާސް ކުރެއްވިއެވެ.
ރައީސް ވިދާޅުވެފަައިވަނީ މީގެ ކުރިން ޝަރީއަތްތައް ހިނގައިދިޔަ ގޮތް ހުރިހާ ފަރާތްތަކަށްވެސް ފެންނާނެ ކަމަށެވެ. އޭރު ކޯޓުތައް ބަރާބަރު ކަމަށާއި ސުޕްރީމް ކޯޓުން ގޮސް ނިމުނީމާ އެއަށްވުރެ ރަނގަޅު ކޯޓެއް ނެތް ކަމަށް ރައީސް ވިދާޅުވިއެވެ. އެ ދުވަހު އެއްޗެއް ނުބުނާކަން ފާހަގަކުރައްވާ ރައީސް ވިދާޅުވީ މިނިވަންކަމާ ޝަރީއަތް ހިންގުމުގެ ބާރު ދޫކޮށްލާފައިވާ ކަމަށެވެ. ހަމައެގޮތަށް ރައްޔިތުންގެ މަޖިލީހާއި އޭސީސީ އާއި އޮޑިޓު އޮފީސްވެސް މިނިވަންކަމާ ހިންގުމަަށް ދޫކޮށްލާފައިވާ ކަމަށް ރައީސް ވިދާޅުވިއެވެ.
ރައީސް ވިދާޅުވި ގޮތުގައި ރައީސް ޔާމީނާ ގުޅޭގޮތުން އަޑުއުފުލުމަކީ މައްސަލައެއް ނޫން ކަމުގައެވެ. އެހެންނަމަވެސް، އެކަމާ ގުޅިގެން ކުރެވޭނެ އެއްވެސް ކަމެއް އަދި ނެތްކަން ރައީސް ފާހަގަކުރެއްވިއެވެ.
އަރިއަތޮޅުގެ ރަށްތަކަށް މިއަދު ފެއްޓެވި ކެމްޕެއިން ދަތުރުފުޅުގައި މިއަދު ހެނދުނު ރައީސް ވަނީ އއ. ތޮއްޑޫއަށް ވަޑަައިގެންފައެވެ. އއ. އަތޮޅުގެ ހަ ރަށަކަށް ކުރައްވާ ކެމްޕެއިން ދަތުރުފުޅުގައި ރަސްދޫއަށްފަހު ބޮޑުފޮޅަދޫ، މަތިވެރި، މާޅޮސް، ފެރިދޫ އަދި އުކުޅަހަށް މިއަދު ރައީސް ވަޑައިގަންނަވާނެއެވެ.
