ކުރިއަށް އޮތް ރިޔާސީ އިންތިހާބަށް އެމްޑީޕީން ކުރައްވަމުން ގެންދަވާ "އުފާވެރި އަމާން ރާއްޖެ" ކެމްޕެއިންގެ ތެރެއިން މިރޭ ޅ. ހިންނަވަރުގައި ބޭއްވި ޖަލްސާގައި ވާހަކަ ދައްކަވަމުން އިމްރާން ވިދާޅުވީ ރައީސް އިބްރާހިމް މުހައްމަދި ސޯލިހަކީ މިވަގުތު ރާއްޖޭގައި ވެސް ހުންނެވި ސިޔާސީ ގޮތުން އެންމެ ފުންނާބު އުސް ލީޑަރު ކަމަށެވެ.
ރައީސް ސޯލިހަކީ ސިޔާސީ ގޮތުން މޮޅު ރައްޔިތުންގެ ލޯބި ހޯދާފައިވާ ފަރާތެއްކަން އިމްރާން ހާމަކޮށްދެއްވީ އެމަނިކުފާނުގެ މަޖިލީހުގެ ދައުރުގެ މައްޗަށެވެ. ވިދާޅުވީ ޖެހިޖެހިގެން ތިން ދައުރެއްގައި ހޮވުމަކީ ވެސް ބުރަ އެހާމެ އުނދަގޫ ކަމެއް ކަމަށެވެ. ނަމަވެސް ރައީސް ސޯލިހު ޖެހިޖެހިގެން ހަތް ދައުރު ހޮވުމަކީ ރައްޔިތުން ބަލައިގެންނަ އެންމެ ބޮޑު އިތުބާރު ކަމަށެވެ.
ހިންނަވަރަށް އުފަން ރައީސް އިބްރާހިމް މުހައްމަދު ސޯލިހުގެ ސިޔާސީ ހަޔާތަކީ ހިތް ހެޔޮ ކެތްތެރި ދުރުވިސްނޭ ލީޑަރެއް ކަމަށް އިމްރާނު ވިދާޅުވި އެވެ.
އިމްރާން ވިދާޅުވީ އެމަނިކުފާނު ރާއްޖޭގެ ހުރިހާ ސިޔާސީ ލީޑަރުންނާއެކުވެސް މަސައްކަތް ކުރެއްވި ކަމަށާއި، ރައީސް ސޯލިހު ވަރުގެ ރަގަޅު ސިޔާސީ ލީޑަރަކު އަދި މިހާތަނަށް ނުފެންނަ ކަމަށެވެ.
އިމްރާން ވިދާޅުވީ ރައީސް ޔާމީން ހޮވައިދެއްވުމުގައިވެސް ވަރަށް ގާތުން މަސައްކަތް ކޮށްދެއްވި ކަމަށާއި، އެހެން ނަމަވެސް 2018 ގައި، ރައީސް ސޯލިހު ހޮވައިދުމުގައި ހުންނަވަންޖެހުނީ މަސައްކަތް ނުކުރެވޭ ހާލަތުގައި ކަމަށެވެ.
އިމްރާން ވިދާޅުވީ މި ކެމްޕެއިން ހިނގަމުންދާ ގޮތް ވަރަށް ގާތުން ބައްލަވަމުން އަންނަ ކަމަށާއި، އެއްބުރުން އެމްޑީޕީން އިންތިހާބު ކާމިޔާބުވާނެ ކަމާމެދު ޔަގީން ކުރައްވާ ކަމަށެވެ.
