މަގޫދޫ އެއާޕޯޓް ތަރައްގީ ކުރުމުގެ މަޝްރޫއުގެ ދަށުން 1،800 އަކަ މީޓަރުގެ ރަންވޭއެއް ހެދުމާއި 81،443 އަކަ މީޓަރުގެ އޭޕްރަން ހެދުމާއި 2،919 އަކަ މީޓަރުގެ ޓެކްސީވޭ ހެދުމުގެ މަސައްކަތް އެމްޓީސީސީން ކުރާނެއެވެ. އަދި 895 އަކަ މީޓަރުގެ ފަޔަ ޕެޑްއެއް ހެދުމާއި 3،059 އަކަ މީޓަރުގެ އެއާޕޯޓް ރޯޑް ހެދުމާއި 1،185 އަކަ މީޓަރުގެ ސާވިސް ރޯޑް ހެދުމުގެ މަސައްކަތް އެ ކުންފުނިން ކުރިއަށް ގެންދާނެއެވެ.
މި މަޝްރޫއުގެ ދަށުން ޓާމިނަލް ބިލްޑިންއެއް ގާއިމުކުރުމާއި ފަޔަ ބިލްޑިން އާއި ފަޔަ ޕޮންޑް އަދި އަލިފާން ނިއްވާ ވަސީލަތް ގާއިމުކުރުމާއި ސެކިއުރިޓީ ޕޯސްޓަކާއި ސެކިއުރިޓީ ވަސީލަތް ގާއިމުކުރުމުގެ މަސައްކަތް ކުރާނެއެވެ. އޭގެ އިތުރުން ފެންސިން ޖެހުމާއި ޕެރިމީޓަ ލައިޓިން ޖެހުމާއި އެއާފީލްޑް ލައިޓިން ސިސްޓަމެއް ގާއިމުކުރުމާއި ނެރު ބައްތި ހަރުކުރުމާއި މެޓް ވަސީލަތްތައް ގާއިމުކުރުމާއި ގްރައުންޑް ހެންޑްލިން ވަސީލަތްތައް ގާއިމުކުރުމާ އަދި މަގުމަތީ ނިޝާން ހަރުކުރުމުގެ މަސައްކަތް ކުރުމަށް ހަމަޖެހިފައިވާ ކަމަށް އެމްޓީސީސީން ބުނެއެވެ.
އެމްޓީސީސީން ބުނީ މި މަޝްރޫއަކީ 264.9 މިލިއަން ރުފިޔާގެ މަޝްރޫއެއް ކަމުގައެވެ.
