އެމްޑީޕީން މާލޭގެ ދަނޑިކޮށި ޖަގަހައިގައި މިހާރު ކުރިއަށްދާ އެމްޑީޕީގެ ކެމްޕެއިން ދެވަނަ ބުރު ފެށުމުގެ ޖަލްސާގައި ވާހަކަ ދައްވަމުން އިމްރާން ވިދާޅުވީ އެމްޑީޕީ އިންތިހާބުން ބަލި ނުކުރެވޭ ކަމަށެވެ.
ޕީޕީއެމްގެ ޖަލްސާއެއްގައި އިދިކޮޅު ޕީޕީއެމް / ޕީއެންސީ ކޯލިޝަނުން ބޭއްވި ޖަލްސާގައި ޕީޕީއެމްގެ ރައީސް އަބުދުއްރަހީމް އަބުދުﷲ ވިދާޅުވީ ރައީސް އިބްރާހިމް މުހައްމަދު ސޯލިހު ޕީޕީއެމްގެ ވެރިކަމެއްގައި ޖަލަށް ލާނެ ކަމަށް ވިދާޅުވި ވާހަކަ އަށް ރަށްދުދެއްވައި ވިދާޅުވީ އެމްޑީޕީއާއެކު އަދާލަތު ޕާޓީ ނުކުތީ ސިޔާސީ ފަރާތްތަކުން ޖަލުގެ ކުޑަގޮޅި އަށް ލިޔަ ނުދޭން ކަމަށެވެ.
އެމްޑީޕީން ވަނީ ރިޔާސީ އިންތިހާބުގެ ފުރަތަމަ ބުރުގައި ވަރަށް ބޮޑު ތަފާތަކުން ބަލިވެފަ އެވެ.
އިމްރާން ވިދާޅުވީ ރިޔާސީ ރޭހުގެ ފުރަތަމަ ބުރުގައި ދަށް ނަތީޖާއެއް ލިބިފައި ވަނީ އެކަށީގެންވާ ވަރަށް މަސައްކަތް ނުކުރެވި މަޑުމަޑުން ތިބުމުން ކަމަށް ގަބޫލުކުރައްވާ ކަމަށެވެ. އަދި ވިދާޅުވީ އިތުރު ހިތްވަރާއެކު މި ނިކުތީ އިންތިހާބު ކާމިޔާބު ކުރަން ކަމަށެވެ.
އިމްރާން ވިދާޅުވީ ރިޔާސީ ދެވަނަ ބުރުގައި ރައްޔިތުން ވިސާނެ ކަމަށާއި، އިދިކޮޅު ޕީޕީއެމް ކޯލިޝަނަށް ވެރިކަން ލިބިއްޖެނަމަ މާލެ ސަރަހައްދުން ގޯތި ދިން ފަރާތްތަކުގެ އަތުން ގޯތިވެސް އަތުލައްވާނެ ކަމަށާއި، ރަށްރަށުގެ ތަރައްގީގެ މަސައްކަތްތައްވެސް ހުއްޓިދާނެ ކަމަށެވެ.
އިމްރާން ވިދާޅުވީ އެމްޑީޕީ އަދި އަދާލަތު ޕާޓީ އާއި އެމްޑީއޭ އަށްވެސް ސީރިއަސް ވާން އެނގޭ ކަމަށާއި، ދެވަނަ އިންތިހާބު ކާމިޔާބު ކުރައްވާނީ ފަސޭހަ ކަމާއެކުގައި ކަމަށެވެ.
