ރިޔާސީ އިންތިހާބުގެ ފުރަތަމަ ބުރުން ކުރި ހޯއްދެވި ޑރ. މުއިއްޒު ދީފައިވާ އިންޓަވިއުއެއްގެ ވީޑިއޯއަކާ އެކު އެކްސްގައި ރޮޒައިނާ ވިދާޅުވީ "އިންޑިއާ އައުޓް" ގެ ނަމުގައި ހިންގި ކެމްޕެއިނަކީ މި ސަރުކާރާ ދޭތެރޭ ރައްޔިތުންގެ ހިތުގައި ނަފުރަތު އުފެއްދުމަށް ކުރި ކަމެއް ކަމަށެވެ.
ރޮޒައިނާ ހިއްސާކޮށްފައިވާ ވީޑިއޯ އިންޓަވިއުގައި މުއިއްޒު ވިދާޅުވެފައިވަނީ ހާރިޖީ ސިޔާސަތު ރަނގަޅުކޮށްލަން ޖެހޭނެ ކަމަށާއި އިންޑިއާއަކީ އެންމެ ގާތް ރަހުމަތްތެރި އަވަށްޓެރިޔާ ކަމަށެވެ.
އެކަމާ ގުޅޭގޮތުން ރޮޒައިނާ ވިދާޅުވީ އިންޑިއާ އައުޓް ކެމްޕެއިންގެ ނަތީޖާއަކީ އިންޑިއާ ރައްޔިތުންނާއި ދިވެހިންނާ ދޭތެރޭ އޮތް ޒަމާންވީ ރަހުމަތްތެރިކަން ނަފްރަތަށް ބަދަލުވެ އެތައް ބައެއްގެ ހިތުގައި ހަގީގަތެއް ނެތް ބިރުވެރިކަމެއް އުފެދުން ކަމަށެވެ.
ރިޔާސީ އިންތިހާބު ކާމިޔާބު ކުރެވިއްޖެ ނަމަ ގެންގުޅުއްވާނެ ހާރިޖީ ސިޔާސަތާ ގުޅޭގޮތުން ޑރ. މުއިއްޒު ވިދާޅުވެފައިވަނީ އޭނާ ގެންގުޅުއްވާނީ ކުރީގެ ރައީސް އަބްދުﷲ ޔާމީން ގެންގުޅުއްވި ވަކި ކޮޅަކަށް ނުޖެހޭ ސިޔާސަތު ކަމަށެވެ. ޑރ. މުއިއްޒު ވަނީ ވެރިކަމުގެ ފުރަތަމަ ދުވަހު އިންޑިއާ ސިފައިން ރާއްޖޭން ފޮނުވާލުމުގެ ވާހަކަތައް ފައްޓަވާނެ ކަމަށް އިންތިހާބުގެ ކެމްޕެއިންގެ ތެރޭގަައި ވިދާޅުވެފައެވެ.
