މި މަހުގެ 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރަށް ތާއިދު ހޯއްދެވުމަށް މާފަންނުގައި ބޭއްވި ކަންމަތީ ބައްދަލުވުމުގައި ރައީސް ސޯލިހު ވިދާޅުވީ ފައިސާ ފޮތީގެ އެއް ފުށް ފެންނަ ބަޔަކަށް އިގުތިސާދު ނުދެމެހެއްޓޭނެ ކަމަށެވެ.
މިއަދު މާލީ އެހީއަށް އެދުމުން، އެ އެހީތެރިކަން ދޭނެ އެތަށް ޤައުމެއް އެބައޮތްކަމަށާއި، އެ އިތުބާރު ރާއްޖެއިން ހޯދާފައިވާކަމަށް ރައީސް ސޯލިހު ވިދާޅުވިއެވެ. އެމަނިކުފާނުގެ ވާހަކަފުޅުގައި ރާއްޖެއިން ނަގާ ލޯނުތައް ދެއްކާނެކަމުގެ ޔަގީންކަން މިހާރު އެޤައުމުތަކާ މާލީ އިދާރާތަކަށް އެބައޮތްކަމަށް ވިދާޅުވިއެވެ.
ރައީސް އިތުރަށް ވިދާޅުވީ ރާއްޖެ ބަނގުރޫޓުވުމުގެ ފުރުސަތު ނުދެއްވާނެ ކަަމަށާއި ރިޔާސީ އިންތިހާބުގެ ދެ ވަނަ ކާމިޔާބު ކުރައްވާނެ ކަމަށެވެ. އަދި ވިދާޅުވި، މި ސަރުކާރު ކޯލިޝަންގެ ތެރޭގައި އިގްތިސޯދު ރަނގަޅަށް ދެނެވަޑައިގަންނަވާ އެ ދާއިރާތަކުގެ އިސް ބޭފުޅުން އެބަތިއްބެވެ. އަދި ސިޔާސަތުތައް ކަނޑައަޅަނީ އެ ބޭފުޅުންގެ ވިސްނުމާ އެކީގައި، ރައްޔިތުންނަށް ފައިދާވާނެ ގޮތަށް ކަމަށް ވިދާޅުވި އެވެ. އެހެންވެ، ވިސުނުންތެރިކަމާއެކު މަސައްކަތްކޮށް ދެ ވަނަ ބުރު ކާމިޔާބު ކުރުމަށް އާއްމު މެމްބަރުންނަށް ރައީސް ސޯލިހު އިލްތިމާސް ކުރެއްވި އެވެ.
