ރޭ ބިލަބޮންގ ހައި އިންޓަނޭޝަނަލް ސްކޫލްގައި އޮތް ދަ ޑިމޮކްރެޓްސް އިންތިގާލީ ކައުންސިލުގެ ހަތްވަނަ ބައްދަލުވުމުގައި އާޒިމް ވިދާޅުވީ ރިޔާސީ ނިޒާމެއްގައި ބަޔަކާއެކު މަސައްކަތް ކުރުމަކީ ފަސޭހަކަމެއް ނޫން ކަމަށެވެ. އަދި ކުރިންވެސް ކޯލިޝަން ހަދައިގެން ކުރިއަަށް ނުދިޔަ ކަމަށެވެ.
އާޒިމް ވިދާޅުވީ އެކަނި ނުކުމެ "އެހެން ގޮތެއް" ހޯދެން އެބަ އޮތްތޯ މިއަދު ވިސްނަންޖެހޭ ކަމަށެވެ.
އާޒިމް ވިދާޅުވީ، އެންމެ ރަނގަޅީ އެ ޕާޓީ އެކަނި ނުކުމެ ރައްޔިތުންނަށް ހެޔޮގޮތެއް ހޯދުން ކަމަށެވެ. އަދި ވިދާޅުވީ ކޮރަޕްޓުވެފައި ހުރި، ވައްކަން ކުރާ، މީހުން އަޅުވެތިކުރާ ބަޔަކާ އެއްކޮށް ދާކަށް ހެޔޮނުވާނެ ކަމަށެވެ،
މި މަހު 9 ވަނަ ދުވަހު ބޭއްވި ރިޔާސީ އިންތިހާބުގައި ރައީސް އިބްރާހީމް މުހައްމަދު ސޯލިހަށް ލިބިވަޑައިގަތީ ވޯޓުލީ މީހުންގެ ތެރެއިން 86،161 ވޯޓެވެ. އެއީ 39.02 ޕަސަންޓެވެ. ވާދަވެރި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ލިބިވަޑައިގަތީ 101,635 ވޯޓެވެ. އެއީ 46.01 ޕަސަންޓެވެ.
ތިންވަނައަށް އެންމެ ގިނަ ވޯޓު ލިބިވަޑައިގަތީ، އެމްޑީޕީން ވަކިވެ ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ ސަޕޯޓަރުން އުފެއްދި ދަ ޑިމޮކްރެޓްސްގެ ކެންޑިޑޭޓު އިލްޔާސް ލަބީބަށެވެ. އިސްލާޔަށް ހަތް އިންސައްތަ ވޯޓު ލިބިވަޑައިގަތެވެ.
ރިޔާސީ އިންތިހާބުގެ ދެވަނަ ބުރުގައި ވާދަކުރާ އެމްޑީޕީ އާއި ޕީޕީއެމް/ޕީއެންސީއަށް ޑިމޮކްރެޓްސްއިން ހުށަހެޅި ހުށަހެޅުންތަކަށް އެއްބަސްވުމަށް އަންނަ ބުދަ ދުވަހުގެ ނިޔަލަށް ދަ ޑިމޮކްރެޓްސްގައި ރޭ ވަނީ އެ ދެ ޕާޓީއަށް ފުރުސަތު ދީފަ އެވެ.
