ރިޔާސީ އިންތިހާބުގެ ދެވަނަބުރުގެ ކެމްޕޭނަށް ގަލޮޅު ދެކުނުގައި ބޭއްވި ކަންމަތީ ބައްދަލުވުމުގައި، ރައީސް ސޯލިހު ވިދާޅުވީ، މާކުރިން ދޫކޮށްފައިވާ ސްޓޫޑެންޓް ލޯނުތަކެއް، ދިމާވި އެކި ސަބަބުތަކާއި ހުރެ ނުދެއްކި، އަދި ބައެއް ފަރާތްތަކުން ކޯޓާއި ހަމައަށް ދާންޖެހުމުގެ ކަންބޮޑުވުންތަކެއް ހިއްސާ ކުރައްވާފައިވާ ކަމަށެވެ.
އެފަރާތްތަކަށް ހައްލެއް ހޯދައިދެއްވުމަށް މަސައްކަތްތަކެއް އެބަ ކުރައްވާ ކަމަށާއި، އެގޮތުން، ކަނޑައެޅޭ ވަކި އުސޫލެއްގެ ތެރެއިން، ކުރިން ދޫކޮށްފައިވާ ސްޓޫޑެންޓް ލޯނުތައް މާފުކޮށްދެއްވާނެ ކަމަށް ރައީސް ސޯލިހު ވިދާޅުވިއެވެ.
މީގެ ކުރިން، 2019 ވަނައަހަރުގެ ތެރޭގައި ސަރުކާރުން ވަނީ ކުރިން ނަގާފައިވާ ސްޓޫޑެންޓް ލޯންތަކުގެ އިންޓްރެސްޓް ރޭޓް ކުޑަކޮށް، އަދި އެލޯނު ދެއްކުމުގެ މުއްދަތު ވެސް އިތުރު ކޮށްދީފައެވެ. ސްޓޫޑެންޓް ލޯނުތައް ދޫކޮށްފައި ހުރީ ފަސް ޕަސެންޓް އިންޓްރެސްޓް ރޭޓްގައެވެ.
