މިދިޔަ އަހަރުގެ ފަހުކޮޅު ހިނގި މި ހާދިސާއާ ގުޅިގެން ދެ ފިރިހެނަކު ޖަލަށްލާން ކްރިމިނަލް ކޯޓުން މިއަދު ހުކުމް ކުރިނަމަވެސް ދެ މީހުން ކުރެ އެކަކުވެސް ޖަލު ހުކުމް ތަންފީޒު ކުރާކަށް ނުޖެހޭނެއެވެ. ޝަރީއަތުންވަނީ ދެ މީހުންގެ ޖަލު ހުކުމް ޖޫރިމަނާއަކަށް ބަދަލުކޮށްދީފައެވެ.
މި މައްސަލައިގައި ދެ މީހުންގެ މައްޗަށްވެސް ކުރީ 27 ދުވަހުގެ ޖަލު ހުކުމެކެވެ. އެހެންނަމަވެސް މި މައްސަލައާ ގުޅިގެން ކުރިން ތަހުގީގު މަރުހަލާގައި ބަންދުކޮށްފައިވާ މުއްދަތު އުނި ކުރުމުން އެކެއްގެ މައްޗަށް ހަ ދުވަހުގެ ޖަލު ހުކުމެއް ބާކީ އޮތް އިރު އަނެކަކުގެ މައްޗަށް އޮތީ 11 ދުވަހުގެ ޖަލު ހުކުމެވެ. މިބައި ޝަރީއަތުން ޖޫރިމަނާއަށް ބަދަލުކޮށް އެކެއްގެ މައްޗަށް 1200 ރުފިޔާ އަދި އަނެކެއްގެ މައްޗަށް 2200 ރުފިޔާ ދައްކަން މިއަދު ކްރިމިނަލް ކޯޓުން ހުކުމް ކުރިއެވެ.
މި މައްސަލައިގައި ދެ މީހުންވެސްވަނީ ޝަރީއަތުގައި އެ މީހުން ކުރި ކުށަށް އިއުތިރާފުވެފައެވެ. އެހެންކަމުން މައްސަލަ ކުރިއަށް ގެންގޮސްފައިވަނީ އަވަސް ނިޔާގެ މައްސަލައެއްގެ ގޮތުގައެވެ.
