ކުރީގެ ފަނޑިޔާރު ޕީޕީއެމަށް ސޮއިކުރީ ރޭގެ ވަގުތެއްގައެވެ. ޕީޕީއެމުންވަނީ ރައޫފު އެ ޕާޓީއަށް ސޮއިކުރިކަން ހާމަކޮށް ފޮޓޯވެސް އާއްމުކޮށްފައެވެ.
ހައި ކޯޓުގެ ފަނޑިޔާރު ކަމުން ރައޫފް އިސްތިއުފާ ދެއްވީ ފަނޑިޔާރުންނަށް ސަރުކާރުން ދޫކުރި ފްލެޓްތަކެއް ހާއްސަ އަގުތަކެއްގައި ބައްލަވައިގަނެފައިވާ ކަމަށާއި އެ ކަމުގެ ބަދަލެއްގެ ގޮތުން އެ ކޯޓުގެ ގަޒިއްޔާއެއްގެ ހުކުމް ކުރުމަށް ނިންމެވި ކަމަށް ތުހުމަތުކޮށް ޖުޑީޝަލް ސާވިސް ކޮމިޝަން (ޖޭއެސްސީ) އިން ބެލި ސުލޫކީ މައްސަލައެއް ސާބިތުވެ، އޭނާ ވަކި މަގާމުން ވަކިކުރަން ރައްޔިތުންގެ މަޖިލީހަށް ފޮނުވުމުންނެވެ.
ރައޫފް އިސްތިއުފާ ދެއްވިއިރު، އޭނާ ފަނޑިޔާރުކަމުން ވަކިކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން ރައްޔިތުންގެ މަޖިލީހަށް އޮތީ ފޮނުވައިފަ އެވެ. އެއީ ކުރީގެ ސަރުކާރުގެ ދުވަސްވަރު މާލޭގެ ހައި ކޯޓުގައި ތިއްބެވި ފަނޑިޔާރުންނަށް އޭރުގެ ހައުސިން މިނިސްޓްރީން ދިން ފްލެޓްތައް ގަބޫލު ކުރައްވާފައިވާ މައްސަލާގަ އެވެ.
ހައި ކޯޓުގައި ބޮޑެތި އަދި މަޝްހޫރު މައްސަލަތައް ބެއްލެވުމުގައި ބައިވެރިވެ ވަޑައިގަތް ރައޫފަކީ 2011 ވަނަ އަހަރު ހައި ކޯޓަށް އައްޔަން ކުރެއްވި ބޭފުޅެކެވެ. ހައިކޯޓުނުް އިސްތިއުފާ ދެއްވުމަށް ފަހު ސްޓެލްކޯގައިވެސް ރައޫފު މަސައްކަތް ކުރެއްވިއެވެ.
