އިމްތިޔާޒް މިއަދު ވިދާޅުވީ އެމްޑީޕީން ވެރިކަމަށް އައީ ކޮރަޕްޝަނާ ދެކޮޅަށް މަސައްކަތް ކުރަން ވައުދުވެގެން ކަމަށެވެ. ނަމަވެސް، ވެރިކަން ލިބުމާއެކު، އެމްޑީޕީން ވެރިކަން ކުރި ފަސް އަހަރު ވެފައިވަނީ ވައްކަމުގެ ފަސް އަހަރު ކަމަށެވެ.
އިންތި ވިދާޅުވީ މޫނަށް ކަނދުރާއަށް ބެލުމެއްނެތި އެ މައްސަލަތައް ބަލައިގެން ނޫނީ ގައުމަށް ހަމަޖެހުމެއް ނުލިބޭނެކަމަށެވެ.
އިންތި ނިސްބަތްވާ ދަ ޑިމޮކްރެޓްސް ޕާޓީގެ އިންތިގާލީ ޗެއާޕާސަން ހަސަން ލަތީފް ވެސް ވަނީ މި ނިމޭ ސަރުކާރުން ކޮރަޕްޝަނުގެ އަމަލުތަކެއް ހިންގަވާފައިވާކަމަށް ތުހުމަތުކުރައްވައި އެ މައްސަލަތައް ބެލުމަށް އެދިލައްވާފައެވެ.
އެމްޑީޕީ ސަރުކާރުގެ ކޮރަޕްޝަނުގެ މައްސަލަތައް ބެލުމަށް ދަ ޑިމޮކްރެޓްސް އިން ގޮވާލާފައިވާއިރު، އެމްޑީޕީން އަންނަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައެއް މަޖިލީހަށް ވެއްދުމަށް މަސައްކަތްކުރަމުންނެވެ.
