ގަވާއިދަށް ގެނައި ގިނަ އިސްލާހުތަކާއެކު، މިއަދު އާންމު ކޮށްފައިވާ ގަވާއިދުގައި ވާގޮތުން، ޕާސްޕޯޓު ގެއްލިގެން އަލުން ޕާސްޕޯޓު ހަދައިދެވޭނީ، ޕާސްޕޯޓު ގެއްލެން މެދުވެރިވި ހާލަތަށް ރިއާޔަތްކޮށް، ޕާސްޕޯޓު ގެއްލުމުގައި އެ މީހެއްގެ އިހުމާލު އޮތްކަން ނުވަތަ ނެތްކަން އަންގައިދޭ ޕޮލިސް ރިޕޯޓަކާ އެކު ހުށަހެޅުމުން ނެވެ.
ޕާސްޕޯޓު ގެއްލުނީ އިހުމާލުންނަމަ، އާ ޕާސްޕޯޓެއް ހައްދާދެވޭނީ، 2،000 ރުފިޔާއަށް ވުރެ ބޮޑު ނޫން އަދަދަކު ޖޫރިމަނާކުރުމަށްފަހު، އެ ފައިސާ އިމިގްރޭޝަނަށް ދެއްކުމުން ކަމަށް އިސްލާހުގައި ވެއެވެ.
މި އިސްލާހާއެކު، ހަމަ އެ މާއްދާގެ ފަހަތަށް ދެ އަކުރެއްވެސް ވަނީ އިތުރުކޮށްފަ އެވެ. އެއީ:
- ޕާސްޕޯޓު ގެއްލިގެން ކުރާ ޖޫރިމަނާ ނުދެއްކޭ ހާލަތެއްގައި ހުންނަ މީހަކަށް މައްސަލައިގެ ކުޑަ ބޮޑު މިނަށް ބަލައި ދަތުރުކުރުމުގެ ވަގުތީ ލިޔެކިއުމެއް ދޫކުރުމުގެ އިހުތިޔާރު ކޮންޓްރޯލާ ޖެނަރަލަށް ލިބި ދިނުން
- ގެއްލުނު ޕާސްޕޯޓަކީ މުއްދަތު ހަމަވެފައިވާ ޕާސްޕޯޓެއް ނަމަ ޖޫރިމަނާ އަކާ ނުލައި ޕާސްޕޯޓު އާކޮށްދިނުން
ޕާސްޕޯޓު ގެއްލިއްޖެ ނަމަ މީގެ ކުރިން 5،000 އާއި 20،000 ރުފިޔާ އާ ދެމެދުގެ އަދަދަކުން ޖޫރިމަނާ ކުރެ އެވެ. އެއީ ފުރަތަމަ ފަހަރު، 5000 ރުފިޔާ އިން، ދެވަނަ ފަހަރު، 10،000 ރުފިޔާ އިން އަދި ތިންވަނަ ފަހަރަށް 20،000 ރުފިޔާ އިން ނެވެ.
