ސޯޝަލް މީޑިއާގައި އާންމުވެފައިވާ އެ ވީޑިއޯ އިން ފެންނަނީ އެފްއެސްއެމްގެ މުވައްޒަފުންތަކެއް ބޮޑެތި ޖަމްބޯ ބޭގުތަކުގައި ހުރި ކަރުދާސްތަކެއް ކޮންކްރީޓު ގިރާ މެޝިނަކަށް އަޅައި އެ ތަކެތި ހަލާކުކުރާ ތަނެވެ.
ގައުމީ އަރުޝީފުގެ ޑިރެކްޓަރު މުހައްމަދު އާމިރު އަހުމަދު (ފަރެސް އާމިރު) ވިދާޅުވީ މިނިސްޓަރު ޔުމްނާ މައުމޫނާއި ސްޓޭޓް މިނިސްޓަރު ތޯރިގާ މަޝްވަރާކޮށް އަށް ފަހު ނިމުނީ އެފްއެސްއެމްގެ ލިޔުންތަކެއް ކޮންކްރީޓް ގަށާ މެޝިނަކަށް އަޅާ ނައްތާލުމުގެ މައްސަލަ ދިވެހި ފުލުހަށް ހުށަހަޅަން ކަމަށެވެ.
އާމިރު އިތުރަށް ވިދާޅުވީ އެފްއެސްއެމްއިން ލިޔެކިޔުންތައް ނައްތާލާފައި ވަނީ އެ އިދާރާއަށް އެއްވެސް ގޮތަކަށް އެންގުމެއް ނެތި ކަމަށެވެ.
އެ ވީޑީއޯގެ މަންޒަރުތައް ފެންނަ ފޮޓޯތަކަކާ އެކު ހެރިޖޭޖް މިނިސްޓްރީގެ ސްޓޭޓް މިނިސްޓަރު މުހައްމަދު ތޯރިގު މިއަދު ކުރެއްވި ޓްވީޓެއްގައި ވިދާޅުވީ، އެކަންކޮށްފައި ވަނީ އަރުޝީފުގެ ގާނޫނާ ހިލާފަށް ކަމަށެވެ.
އެސްޓީއޯގެ ސަބްސިޑަރީ ކުންފުންޏެއް ކަމަށްވާ އެފްއެސްއެމްގެ ލިޔެކިޔުންތަކެއް ނައްތައިލި މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ވެސް ވަނީ ފުލުހަށް ރިޕޯޓްކޮށްފަ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯއާއެކު ވީޑިއޯ ޕޯސްޓު ކުރި ފަރާތުން ބުނެފައިވަނީ، ވީޑިއޯ އާންމު ކުރީ، ލިޔުންތައް ނައްތާލި ގޮތާއިމެދު ޝައްކު އުފެދި، އެކަމުގައި ގޯސްކަމެއް ހުރިކަން ތުހުމަތު ކުރެވޭތީ ކަމަށެވެ.
މިކަމާއި ގުޅިގެން އެފްއެސްއެމް އިން ބުނެފައިވަނީ ނައްތާލާފައިވަނީ ބޭނުން ނުހިފޭ ލިޔެކިޔުންތަކެއް ކަަމަށެވެ.
މީގެ ކުރިން، އިންތިގާލީ މަރުޙަލާގައި ލިޔެކިޔުންތައް ނައްތާނުލުމަށް، އިންތިޚާބީ ރައީސްގެ އޮފީހުންނާއި، ޕްރައިވެޓައިޒޭޝަން ކޯޕަރަޓައިޒޭޝަން ބޯޑުން ވަނީ ސަރުކާރު ހިިއްސާވާ ކުންފުނިތަކަށާއި، ދައުލަތުގެ ކުންފުނިތަކަށް އަންގާފައެވެ.
