ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވަޒީރު ގީލާ ވިދާޅުވީ، ނަފްސާނީ ސިއްހަތުގެ ގައުމީ ހެލްޕްލައިން އަށް 2024 ވަނަ އަހަރު 2،576 ކޯލް، 2025 ވަނަ އަހަރުގައި 10،821 ކޯލް އަދި 2026 ވަނަ އަހަރުގެ މިހާތަނަށް 10،282 ކޯލް ލިބިފައިވާ ކަމަށެވެ.
މި ދާއިރާ އިތުރަށް ހަރުދަނާކުރުމަށް ސަރުކާރުން ގިނަ ފިޔަވަޅުތަކެއް އަޅަމުންދާކަން ފާހަގަކުރައްވައި ގީލާ ވިދާޅުވީ، ކުޑަކުދިންނަށް ހާއްސަ ނަފްސާނީ ފަރުވާގެ ނިޒާމެއް ގާއިމުކުރުމުގެ މަސައްކަތާއި، ބޭސް ލިބުމުގެ ދަތިކަން ހައްލުކުރުމަށް ޖުމްލަ ނުވަ ރަށެއްގައި އެ ހިދުމަތް ފެށުމުގެ މަސައްކަތް ކުރެވެމުންދާ ކަމަށެވެ.
އަދި 80 އެނދާއެކު ސައިކިއެޓްރިކް އިމަޖެންސީ ހިދުމަތް ފެށުމަށާއި، އެއް ޖިންސަށް ޚާއްސަކޮށްގެން ރީހެބިލިޓޭޝަން ހިދުމަތް ފުޅާކުރުމުގެ އިތުރުން، އަންހެނުންނަށް ހާއްސަ ނަފްސާނީ ބަލިމީހުން ބަލަހައްޓާ މަރުކަޒެއް ގާއިމުކުރުމަށް ވެސް ވަނީ ނިންމާފަ އެވެ.
ހަމައެއާއެކު، ނަފްސާނީ ސިއްހަތާ ގުޅޭގޮތުން މީހުން ބިނާކުރުމާއި ހޭލުންތެރިކުރުމުގެ ދާއިރާއިން ވެސް މުހިންމު ކާމިޔާބީތަކެއް ވަނީ ޙާސިލުކުރެވިފައިވާ ކަމަށް ވިދާޅުވި އެވެ. އެގޮތުން އެމްއެޗްޖީއޭޕީ ޕްރޮގްރާމްގެ ދަށުން 193 މީހުން އަދި ސައިކޮލޮޖިކަލް ފަސްޓްއެއިޑް (ޕީއެފްއޭ) ޕްރޮގްރާމްގެ ދަށުން 164 މީހުން ވަނީ ތަމްރީނުކޮށްފަ އެވެ. އަދި މެންޓަލް ހެލްތު ލިޓްރަސީ ޕްރޮގްރާމް މެދުވެރިކޮށް 512 މީހަކު ވަނީ ހޭލުންތެރިކުރެވިފަ އެވެ.
