ޖުޒާމް ބަލި ނުވަތަ ލެފްރަސީ ފެތުރުން ހުއްޓުވި ފުރަތަމަ ޤައުމު ޝަރަފު ރާއްޖެއަށް ލިބި އެ ބަލި ފެތުރުން ހުއްޓުވިކަމުގެ އެވޯޑް ރާއްޖެއަށް ދީފައިވަނީ އިންޑިއާގެ ނިއު ދިއްލީގައި މިހާރު ކުރިއަށްދާ ޑަބްލިއުއެޗްއޯގެ ސައުތު-އީސްޓް އޭޝިއާ ސަރަހައްދުގެ 76 ވަނަ ބައްދަލުވުމުގައެވެ.
އެ އެވޯޑް ރާއްޖެއަށް އެރުވީ ޑރ ޕޫނަމް ކެރަތަޕާލް ސިންގްއެވެ. އެވޯޑާއި ރާއްޖޭގެ ފަރާތުން ހަވާލުވެޑައިގަތީ ހެލްތް މިނިސްޓަރު އަހްމަދު ނަސީމުއެވެ.
ޑަބްލިއުއެޗްއޯ އިން ވަނީ ރާއްޖެއިން ޖުޒާމް ބަލި ފެތުރުން ހުއްޓުވުމުގައި ހޯދި ކާމިޔާބީއަށް މަރުހަބާ ކިޔާފައެވެ.
ޖުޒާމް ބައްޔަކީ ކުރީގައި ރާއްޖޭގެ ގިނަ ބަޔަކު ތަހައްމަލު ކުރި ބައްޔެކެވެ. ނަމަވެސް، 1982 ވަނަ އަހަރު ރާއްޖޭގައި ޖުޒާމް ބައްޔަށް ބޭސް ތަޢާރަފްކޮށް ރަގަޅު އިންތިޒާމެއްގެ ދަށުން ފަރުވާ ދެވެން ފެށުމާއިއެކު ބަލިޖެހޭ މީހުންގެ އަދަދު ވަނީ ވަރަށް ބޮޑަށް ދަށްވެފައެވެ. އެއާއެކު 1997 ވަނަ އަހަރު ،ޖުޒާމް ބައްޔަކީ ދިވެހިރާއްޖޭގެ އާންމު ސިއްހަތަށް އޮތް ނުރައްކަލެއް ނޫންކަމުގައި ޑަބްލިއުއެޗްއޯ އިން ވަނީ ކަނޑައަޅާފައިވެއެވެ.
