އިންތިހާބީ ރައީސްގެ އޮފީހުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފިރުޒުލް ވިދާޅުވީ 2018 ވަނަ އަހަރު ނިމުނުއިރު ކުންފުނީގެ މުވައްޒަފުންގެ ގޮތުގައި ތިބީ 2،756 މުވައްޒަފުން ކަމަށެވެ. މިހާރު އެ ކޯޕަރޭޝަނުގައި 8،126 މުވައްޒަފުން އެބަތިބި ކަމަށް ލިޔެކިޔުންތަކުން ފެންނަން އެބަހުރި ކަމަށް ފިރުޒުލް ވިދާޅުވި އެވެ.
ފިރުޒުލް ވިދާޅުވެފައިވަނީ ފެނަކައިގެ މުވައްޒަފުންގެ މުސާރައަށް ކުރީ ސަރުކާރުން މަހަކު 23 މިލިއަން ރުފިޔާ ހޭދަކުރިއިރު، ހިނގަމުން މިދާ ސަރުކާރުން މަހަކު 82 މިލިއަން ރުފިޔާ ހޭދަކުރަމުން އަންނަކަން ފާހަގަކުރެވޭ ކަމަށެވެ.
ފެނަކައިގެ މުވައްޒަފުން މަސައްކަތް ކުރަމުން އައި ގޮތަށް ބަލާއިރު މީގެ ކުރިން އެ މުވައްޒަފުން މަސައްކަތް ކުރި ގޮތާއި މިހާރު މަސައްކަތް ކުރަމުން އަންނަ ގޮތަށް، "އެފިޝިއަންސީ" އަށް ތަފާތުތަކެއް އައިސްފައިވާ ކަމަށް ފިރުޒުލް ވިދާޅުވި އެވެ. ފިރުޒުލް ވިދާޅުވި ގޮތުގައި ކުރިން ބިލް ތައްޔާރުކުރުމުގައި މަސައްކަތް ކުރަމުން އައިގޮތް މިހާރު ވަރަށް ބޮޑަށް ލުއިފަސޭހަވާ ގޮތަކަށް ބަދަލުވެފައިވާ ކަން ފާހަގަކުރެވޭ ކަމުގަ އެވެ.
ރާއްޖޭގައި އެތައް ހާސް ކުދިންނަކަށް ކިޔަވައިދިނުމަށް ދިވެހި މުދައްރިސުންގެ ގޮތުގައި މަސައްކަތް ކުރަނީ 8،600 އެއްހާ މުވައްޒަފުންކަން ފާހަގަކުރައްވާ ފިރުޒުލް ވިދާޅުވީ އެ އަދަދުވަރުގެ ބޮޑު އަދަދެއް ފެނަކައިގެ މުވައްޒަފުންގެ ގޮތުގައި އެބަތިބި ކަމަށެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ނެރުނު މި އަހަރުގެ ފުރަތަމަ ކުއާޓަރުގެ ތަފާސް ހިސާބުތަކަށް ބަލާއިރު މި އަހަރުގެ މާޗް މަހުގެ ނިޔަލަށް ފެނަކައިގައި ތިބީ 7،000 އެއްހާ މުވައްޒަފުން ކަމަށް ފިރުޒުލް ވިދާޅުވި އެވެ. ފިރުޒުލް ވިދާޅުވެފައިވަނީ މާޗް މަހުގެ ފަހުން މިއަދާ ހަމައަށް 747 މުވައްޒަފުން އެ ކޯޕަރޭޝަނަށް އިތުރުވެފައިވާ ކަން ފާހަގަ ކުރެވިފައިވާ ކަމަށެވެ.
