އިންތިގާލީ ކޮމެޓީތަކުން ސަރުކާރުގެ ކުންފުނިތަކުގެ މަސައްކަތްތައް ބަލައި އެ ކުންފުނިތަކުގެ ހާލަތާ ގުޅޭގޮތުން އެކުލަވާލާފައިވާ ރިޕޯޓުތަކުގައިވާ މައުލޫމާތުތައް ހިއްސާކުރެއްވުމަށް މިއަދު އިންތިހާބީ ރައީސްގެ އޮފީހުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ފިރުޒުލް ވިދާޅުވީ މިދިޔަ އަހަރުގެ ނިޔަލަށް ފެނަކައިގެ ދަރަނި 4.1 ބިލިއަން ރުފިޔާއަށް އަރާ ކަމަށެވެ.
ފިރުޒުލް ވިދާޅުވެފައިވަނީ ފެނަކައިގެ ދަރަނީގެ ތެރޭގައި އެ ކޯޕަރޭޝަނުން 1،149 ސަޕްލަޔަރުންނަށް ދައްކަން ޖެހޭ ބިލުތަކަށްވާ 3.2 ބިލިއަން ރުފިޔާ ހިމެނޭ ކަމަށެވެ. އެގޮތުން ފައިސާ ދައްކަން ޖެހޭ މުއްދަތު ހަމަވެ، ނުދައްކާ އަހަރަކަށް ވުރެ ގިނަ ދުވަސްވެފައިވާ 958 މިލިއަން ރުފިޔާ ހިމެނޭ ކަމަށް އޭނާ ވިދާޅުވި އެވެ. ފިރުޒުލް ވިދާޅުވި ގޮތުގައި ފެނަކައިން ނަގާފައިވާ ލޯނުތަކަށް ދައްކަން ޖެހޭ ފައިސާގެ އަދަދު 901 މިލިއަން ރުފިޔާއަށް އަރާ ކަމުގަ އެވެ.
މިދިޔަ އަހަރު ފެނަކައިގެ އޮޑިޓް ހަދާފައި ނުވާކަން ފާހަގަކުރައްވާ ފިރުޒުލް ވިދާޅުވެފައިވަނީ މި އަހަރަށް އެ ކޯޕަރޭޝަނުގެ މެނޭޖްމެންޓް ފައިނޭންޝަލް ޕްލޭންވެސް ހަދާފައި ނުވާ ކަމަށެވެ. އެ ކޯޕަރޭޝަނުން ފައިސާ ދައްކަން ޖެހޭ ވިޔަފާރިތަކުގެ ލިސްޓު ހާމަކޮށްފައިވާ ނުވާ ކަމަށް ވެސް ފިރުޒުލް ވިދާޅުވި އެވެ. ފިރުޒުލް ވިދާޅުވީ ދައުލަތުގެ ބަޖެޓުން ބައި ބިލިއަން ރުފިޔާ ކޮންމެ އަހަރަކުވެސް ފެނަކައަށް ހޭދަކުރާ ކަމަށެވެ.
ފިރުޒުލް ވިދާޅުވި ގޮތުގައި ފެނަކައިގެ މި އަހަރުގެ ބަޖެޓު ފާސްކުރިއިރު 960 މިލިއަން ރުފިޔާއަކީ ދަރަނި ކަމަށް ހިމަނާފައިވާ ކަމުގަ އެވެ. އެހެންނަމަވެސް، މި ދަރަނި ފައިނޭންސް ކުރާނެ ގޮތް ބަޖެޓުގައި ހިމަނާފައި ނުވާކަން އޭނާ ފާހަގަކުރެއްވި އެވެ. ފިރުޒުލް ވިދާޅުވީ ބޮޑު ދަރަންޏަކާ އެކު ބަޖެޓު ފާސްކުރުމަށްފަހު، އެ ކޯޕަރޭޝަނަށް މުވައްޒަފުން އިތުރުކޮށް، ތަކެތި ގަނެ އަދި މަޝްރޫއުތައް ކުރިއަށް ގެންގޮސްފައިވާ ކަމަށެވެ.
ފިނޭންސް މިނިސްޓްރީން ރައްޔިތުންގެ މަޖިލިހަށް ދާދިފަހުން ހިއްސާކުރި މައުލޫމާތުން އެނގޭ ގޮތުން ފެނަކައިން ވަނީ އެ ކޯޕަރޭޝަނުގެ ދަރަނިތައް ފިލުވުމަށް މޯލްޑިވްސް އިސްލާމިކް ބޭންކް (އެމްއައިބީ) އިން ލޯނުގެ ގޮތުގައި 400 މިލިއަން ރުފިޔާ ނަގާފަ އެވެ. އެ ފައިސާގެ އިތުރަށް މަޖިލިހަށް ފޮނުވާފައިވާ ސަޕްލިމެންޓްރީ ބަޖެޓުން ކުންފުނިތަކަށް ދިނުމަށް ކަނޑައަޅާފައިވާ 903 މިލިއަން ރުފިޔާގެ ތެރެއިން 72 އިންސައްތަ ހާއްސަކޮށްފައިވަނީވެސް ފެނަކައަށެވެ.
