ގެދޮރުވެރިޔާ ސްކީމުގެ ދަށުން އެންމެ ފުރަތަމަ ދޫކުރުމަށް ހަމަޖެހުނު 4,000 ފްލެޓަށް ޝަރުތު ހަމަވި މީހުންގެ ދާއިމީ ލިސްޓު ޕްލޭނިން މިނިސްޓްރީން އާންމުކުރުމާ ގުޅިގެން ގިނަ އަދަދެއްގެ ފަރާތްތަކުގެ ޝަކުވާތަކާއި ކަންބޮޑުވުންތައް އިންތިހާބީ ރައީސްގެ އޮފީހަށްވެސް ލިބިފައިވާ ކަމަށް ފިރުޒުލް ވިދާޅުވި އެވެ.
ފިރުޒުލް ވިދާޅުވެފައި ވަނީ ދައުރު ބަދަލުވުމަށް ގާތްގަނޑަކަށް ނުވަ ދުވަހަށް ވެފައިވާއިރު، މި ދަނޑިވަޅުގައި ފްލެޓުތައް ހަވާލުކުރުމުގެ ބަދަލުގައި އާ ސަރުކާރަށް އެކަން ދޫކޮށްލުމަށް މުއިއްޒު އެދިވަޑައިގަންނަވާ ކަމަށެވެ.
މީގެކުރިން އިންތިހާބީ ރައީސްގެ އޮފީހުން ބުނެފައިވަނީ މި ސަރުކާރުން ދީފައިވާ އެއްވެސް އެއްޗެއް އަތުލުމަކީ މުއިއްޒު ކުރައްވާނެ ކަމެއް ނޫން ކަމަށެވެ. އެކި ސްކީމުތަކަށް ހުށަހަޅާ އެއްވެސް ފޯމެއް ބާތިލު ނުކުރައްވާނެ ކަމަށް މުއިއްޒުވެސް ކުރިން ވިދާޅުވެފައިވެ އެވެ.
