ފޮރިން މިނިސްޓްރީން އެގޮތަށް އަންގާފައި ވަނީ ރާއްޖޭގެ ޑިޕްލޮމެޓިކް އަދި ކޮންސިއުލާ މިޝަންތަކުގައި ވަޒީފާ އަދާކުރައްވަމުން ގެންދަވާ ބައެއް ބޭފުޅުން އަންނަ ހަފުތާގެ ނިޔަލަށް ރާއްޖެ ގެނައުމަށް އިންތިހާބީ ރައީސް ޑރ. މުހައްމަދު މުއިއްޒުގެ އޮފީހުން އެދުމާ ގުޅިގެންނެވެ.
ފޮރިން މިނިސްޓްރީން ބުނެފައިވާ ގޮތުގައި އިންތިހާބީ ރައީސްގެ އެދިވަޑައިގަތުމާ އެއްގޮތަށް ސިޔާސީ މަގާމުތަކުގައި ތިއްބެވި 61 ބޭފުޅަކަށް އެ ދުވަހުގެ ކުރިން ރާއްޖެ ވަޑައިގަތުމަށް މިހާރު ދަންނަވާފައިވާ ކަމުގަ އެވެ.
އިންތިހާބީ ރައީސް ވެރިކަމާ ހަވާލުމަށް ތައްޔާރުވަމުން އަންނައިރު، ސަރުކާރުގެ ކެބިނެޓަށް ވަޑައިގަންނަވާނެ ކަމަށް ބެލެވޭ ބޭފުޅުންގެ ލިސްޓެއް މިހާރު ވަނީ އާންމުވެފަ އެވެ. އޭގައިވާ ގޮތުން ފޮރިން މިނިސްޓަރު ކަމަށް ވަޑައިގަންނަވާނީ ކުރީގެ ރައީސް އަބްދުﷲ ޔާމީންގެ ވެރިކަމުގައި ޓޫރިޒަމް މިނިސްޓަރުކަން ކުރެއްވި މޫސާ ޒަމީރެވެ.
ސަރުކާރުގެ ކުންފުނިތަކަށް ވަޑައިގަންނަވާނެ ބޭފުޅުން ފައިނަލްކުރުމުގެ މަސައްކަތް ކުރަމުން އަންނައިރު، ރާއްޖޭގެ މިޝަންތަކަށްވެސް އާ ސަރުކާރުން ބޭފުޅުން އައްޔަންކުރައްވާނެ އެވެ.
