އަންނަ އަހަރަށް ލަފާކުރާ ބަޖެޓު ރައްޔިތުންގެ މަޖިލިހުގައި މިއަދު ހުށަހަޅުއްވަމުން އަމީރު ވިދާޅުވީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހަމަޖެއްސި 4.4 ބިލިއަން ރުފިޔާގެ އޯވާޑްރާފްޓް ފެސިލިޓީގެ ބައެއް ދެ ފަހަރެއްގެ މަތިން ސެކިއުރިޓައިޒްކޮށް، އޯވާޑްރާފްޓް ލިމިޓް މި އަހަރު ދެ ބިލިއަން ރުފިޔާއަށް ވަނީ ކުޑަކޮށްފައި ކަމަށެވެ.
ދައުލަތުގެ ހަރަދަށް ޒިންމާވުމުގެ ގާނޫނުގެ ދަށުން އެމްއެމްއޭއިން ސަރުކާރަށް ދަރަނި ނެގޭ މިންވަރު ލިމިޓުކޮށްފައި އޮތް ނަމަވެސް ކޮވިޑު-19 އާ ގުޅިގެން 2020 ވަނަ އަހަރުގެ އެޕްރީލް މަހު ވަނީ އެ ގާނޫނުގެ ބައެއް މާއްދާތައް ސަސްޕެންޑްކޮށްފަ އެވެ. އަދި ސަރުކާރުން އެދިގެން ފަހުން ވަނީ އެ މުއްދަތު މި އަހަރުގެ ނިޔަލަށް އިތުރުކޮށްފަ އެވެ.
ރިޔާސީ އިންތިހާބުގެ ކެމްޕެއިނުގެ ތެރޭގައި އިންތިހާބީ ރައީސް ޑރ. މުހައްމަދު މުއިއްޒު ވަނީ މި ސަރުކާރުން އަށް ބިލިއަން ރުފިޔާ ޗާޕުކޮށްފައިވާ ކަމަށް ވިދާޅުވެ، ސަރުކާރުން ގެންގުޅޭ ފައިސާ ޗާޕް ކުރުމުގެ ސިޔާސަތަށް ފާޑު ވިދާޅުވެފަ އެވެ.
ވެރިކަމަށް ވަޑައިގަތުމަށްފަހު އިސްކަން ދެއްވާނެ އެއް ކަމަކީ އިގުތިސޯދީ އަނދަވަޅުން ގައުމު ނަގާ ކޮޅަށް ޖެހުން ކަމަށް މުއިއްޒު ވިދާޅުވި އެވެ. މުއިއްޒު ވިދާޅުވެފައިވާ ގޮތުގައި ފައިސާ ޗާޕުކުރަން ފުރުސަތު ހޯދުމަށް ސަސްޕެންޑް ކޮށްފައިވާ މާއްދާ އުވާލަން މަޖިލިހަށް ހުށަހަޅުއްވާނެ ކަމަށާއި އެމަނިކުފާނުގެ ސަރުކާރުގައި ފައިސާ ޗާޕު ނުކުރައްވާނެ ކަމުގަ އެވެ.
