މައުލޫމާތު ލިބޭގޮތުން އޭސީސީން ތަހުގީގު ކުރަމުން ދަނީ އެ ކޮމިޝަނުން ނިންމާފައިވާ ބައެއް ތަހުގީގުތަކުގެ ނިންމުންތައް ބަދަލުކުރި ކަމަށް ބުނާ މައްސަލައެއްގަ އެވެ. އެ ތުހުމަތު ކުރައްވާފައި ވަނީ މިދިޔަ ހޯމަ ދުވަހު އިސްތިއުފާ ދެއްވި އޮމްބަޑްސްޕާސަން ޖިހާދާ އަނީސް އެވެ.
އިސްތިއުފާ ދެއްވުމަށްފަހު ނެރުއްވި ބަޔާނެއްގައި ޖިހާދާ ވަނީ އެ އޮފީހުން މައްސަލަތައް ނުނިންމައި ދިގު ދެންމުމަށް ފަހުގައި ވެރިކަމުގެ ދައުރު ނިމެން ދެ ހަފުތާގެ މުއްދަތެއް އޮއްވައި، ގަވާއިދުތަކާއި ތަހުގީގުކުރުމުގެ އުސޫލުތަކަށް ބެލުމެއްނެތި ކުއްލިއަކަށް މަސައްކަތްތައް ނިންމަން ފަށައި، ކުރިން ނިންމާފައިވާ ބައެއް މައްސަލަތަކުގެ ނިންމުން ބަދަލުކޮށްފައިވާ ކަމަށް ތުހުމަތު ކުރައްވާފަ އެވެ.
ޖިހާދާ ވިދާޅުވެފައި ވަނީ އޮމްބަޑްސްޕާސަނުން ހާޒިރުނުވާ ބައްދަލުވުންތަކަށް ހާޒިރުވި ކަމަށް ހެދުމާއި އޮމްބަޑްސްޕާސަނުންގެ ރަސްމީ ބައްދަލުވުންތަކުގައި މީގެކުރިން ނިންމާފައިވާ މައްސަލަތަކުގައި ބައިވެރިވި އޮމްބަޑްސްޕާސަނުންނަށް އެނގުމެއްނެތި ތާވަލުކޮށް، އަލުން ގޮތް ނިންމަމުންދާ ކަމަށެވެ. އަދި އެފަދަ ކަންކަމާ ގުޅޭ މައުލޫމާތު އޭނާއަށް ނުލިބޭ ކަމަށާއި އިންތިގާލީ އިންސާފުގެ ގާނޫނާ ހިލާފަށް މަސްލަހަތު އެކުލެވޭ މައްސަލަތަކުގައި ބައިވެރިވެ ގޮތް ނިންމަމުންދާ ކަމަށްވެސް ޖިހާދާ ވިދާޅުވެފައިވެ އެވެ.
އިންތިގާލީ އިންސާފުގެ އޮފީހުގެ ދައުރު ހަމަވާން ދެ ދުވަހަށް ވުރެ ވެފައިވާއިރު، އެ އޮފީހަށް އެކަށީގެންވާ މަސައްކަތްތަކެއް ނުކުރެވުނު ކަމުގެ ފާޑުކިޔުންތައް ވަނީ އަމާޒުވެފަ އެވެ.
ރާއްޖޭގައި އެންމެފަހުން ކުރި ފަސް ވެރިކަމުގައި ދިވެހިންނަށް ލިބުނު އަނިޔާތަކަށް އިންސާފު ހޯދައިދިނުމުގެ މަގުސަދުގައި އިންތިގާލީ އިންސާފުގެ ގާނޫނު ފާސްކޮށްފައި ވަނީ 2020 ވަނަ އަހަރުގެ ނޮވެމްބަރު މަހުގެ 29 ވަނަ ދުވަހު އެވެ.
