މިއަހަރުގެ ދަޢުލަތުގެ ހަރަދުތައް ހަމަޖެއްސުމަށް ފިނޭންސް މިނިޓްރީއިން ސަޕްލިމެންޓްރީ ބަޖެޓެއް މަޖިލީހަށް ހުށައެޅުއްވީ އޮކްޓޯބަރު މަހުގެ 18 ވަނަ ދުވަހުއެވެ.
ޤާނޫނުގައި ބުނާ ބައެއް ޝަރުތުތައް ފުރިހަމަނުވާތީ، ބަޖެޓު މަޖިލީހުން އަނބުރާ ފޮނުވާލުމަށްފަހު، އެކަންކަން އިސްލާޙުކޮށް އަލުން ހުށައެޅީ އޮކްޓޯބަރު 25 ވަނަ ދުވަހުއެވެ.
މިއަދު ބަޖެޓު ކޮމިޓީގެ ތިން ވަނަ ބައްދަލުވުމުގައި ބަޖެޓާއި ގުޅޭ ގޮތުން މަޝްވަރާކުރެވި ވޯޓަށް އަހާފަވެއެވެ.
ވޯޓުގައި ބައިވެރިވި 19 މެންބަރުންގެ ތެރެއިން 16 މެންބަރުން ވަނީ ސަޕްލިމަންޓްރީ ބަޖެޓު ފާސްކުރުމަށް ވޯޓު ދީފައެވެ.
މިއަހަރުގެ ދައުލަތުގެ ބަޖެޓަށް އިތުރުކުރުމަށް ފިނޭންސް މިނިސްޓްރީން ހުށަހެޅީ 6.5 ބިލިއަން ރުފިޔާއެވެ. އިތުރުކުރި ހަރަދާއެކު މިއަހަރަށް ފާސްކޮށްފައިވާ 42.8 ބިލިއަން ރުފިޔާގެ ބަޖެޓް ވަނީ 49.3 ބިލިއަން ރުފިޔާއަށް ބޮޑުވެފައެވެ.
ސަޕްލިމަންޓްރީ ބަޖެޓަށް ގެނައި އިސްލާހުތަކުގެ ތެރޭގައި، މީޑީއާތައް ހިންގުމުގައި އެހީތެރިކަން ދިނުމަށް ފައިސާ ހިމަނާފައެވެ.
އެގޮތުން ރެޖިސްޓްރީކޮށްގެން ހިންގާ ބްރޮޑްކާސްޓް ހިދުމަތްދޭ މީޑިއާތަކަށް ހާއްސަކޮށް ހުށައެޅި 6.5 މިލިއަން ރުފިޔާގެ ބަޖެޓެއް ވަނީ ފާސްކޮށްފައެވެ.
