ދިވެހިރާއްޖެއަށް އިޒްރޭލު ޕާސްޕޯޓުގައި އެތެރެވުން މަނާކުރުމަށް އިމިގްރޭޝަން ގާނޫނަށް އިސްލާހު މަޖިލީހަށް ހުށަހަޅުއްވަނީ ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ އެވެ. އެ ބިލުގައި ވަނީ ރާއްޖެ އެތެރެވުން މަނާ މީހުންގެ ގޮތުގައި އިމިގްރޭޝަން ގާނޫނުގައި ބަޔާން ކުރާ މާއްދާގެ ފަހަތަށް އިތުރު އަކުރެއް އިތުރުކޮށްފަ އެވެ.
ބިލު ހުށަހަޅުއްވާ ސަބަބެއްގެ ގޮތުގައި މެންބަރު ފާހަގަކުރައްވާފައި ވަނީ، އިޒްރޭލުން ހިންގަމުން އަންނަ ލާއިންސާނީ އަމަލުތަކާއި ގަތުލުއާންމުގައި އެތައް ކުޑަކުދިންނާއި އަންްހެނުން މަރަމުން ދާތީ، އިޒްރޭލުގެ އަމަލުތައް ހުއްޓުވުމަށް ދަތި ކުރުމުގެ ފިޔަވަޅުތައް އެޅުމަށެވެ.
ރާއްޖެ ވެސް ހިމެނޭ އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ)އިން ވެސް އެ ޖަމާއަތުގެ ގައުމުތަކަށް އިޒްރޭލު ޕާސްޕޯޓުގައި އެތެރެވުން މަނާކޮށްފައިވާއިރު، ރާއްޖެއިން ވެސް ފިޔަވަޅު އަޅައި ނަމޫނާ ދެއްކުމަކީ މުހިންމު ކަމެއް ކަމަށް ފާހަގަކޮށްފައިވެ އެވެ.
މި މައްސަލައިގައި މާދަމާ ހެނދުނު 9:45 ގައި މަޖިލިސް އިދާރާގެ ދޮރުމަތީގައި އަދި މެންދުރު 12:00 ގައި ފޮރިން މިނިސްޓްރީ ދޮރުމަތީގައި މުޒާހަރާކުރުމަށް ވަނީ ނިންމައިފަ އެވެ.
