ދިވެހި ގައުމީ ދިދަ 24 ގަޑިއިރު ނަގައިފައި ބެހެއްޓުމާ ބެހޭގޮތުން ރައީސް މުއިއްޒު ދިވެހި ޒައާމަތާ ހަވާލުވެވަޑައިގެން ގައުމާ މުހާތަބު ކުރައްވައި ދެއްވި ފުރަތަމަ ތަގުރީރުގައިވެސް އިޝާރާތް ކުރެއްވި އެވެ.
އެމަނިކުފާނު ވިދާޅުވި ގޮތުގައި ފަހުރުވެރި ދިވެހި ދިދައަކީ ދިވެހިރާއްޖޭގެ ކޮންމެ ކަންކޮޅެއްގައި، ކޮންމެ ތަނެއްގައި ތިރިކުރުމެއްނެތި ރެޔާއިދުވާލު 24 ގަޑިއިރު ޝަރަފާއި އިއްޒަތާއެކު ވިހުރި ވިހުރި ހުންނާނެ އެންމެ އިއްޒަތްތެރި ނިޝާނެވެ.
ރައީސް އޮފީހުގެ ބޭއްވި ނޫސްވެރިންގެ ބައްދަލުވުމުގައި އެ އޮފީހުގެ އަންޑާ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އަބްދުﷲ ހަލީލް ވިދާޅުވީ ދިވެހި ދިދައަކީ ދިވެހިވަންތަކަން އެންމެ ބޮޑަށް ރަމްޒުކޮށްދޭ އެއް ނިޝާން ކަމަށްވާތީ ވަޒީރުންގެ ގެ އާއި އެ ބޭފުޅުންގެ ކާރުގައި ވެސް ދިވެހި ދިދަ ވިހުރިވިހުރި ހުންނަން ޖެހޭ ގޮތަށް ރައީސް ނިންމަވާފައިވާ ކަމަށެވެ.
ފިރުޒުލް ވިދާޅުވީ ދިވެހި ގައުމަށް ކުރާ ގަދަރު އަލުން އިއާދަކުރެއްވުމަކީ ރައީސްގެ ތަގުރީރުގައި ވެސް އެންމެ ބޮޑަށް އަލިއަޅުއްވާލެއްވި އެއް ނުކުތާ ކަމަށެވެ.
ފިރުޒުލް ވިދާޅުވީ ރައީސް ޑރ. މުއިއްޒުގެ ވިސްނުންފުޅުގައި ގައުމީ ދިދައަކީ ގައުމެއްގެ ގޮތުގައި ދިވެހި ރައްޔިތުން ރަމްޒުކޮށްދޭ އެންމެ މަތިވެރި ނިޝާންކަމަށެވެ. އެ ނިންމެވުން އެ މަނިކުފާނު ނިންމެވީ އެހެންވެކަމަށް ފިރުޒުލް ވިދާޅުވިއެވެ.
މީގެ އިތުރުން ދިވެހި ދިދަ މުޖުތަމައު ތެރޭގައި ބޭނުންކުރާ މިންވަރު އިތުރުކޮށް، ދިދައަށް އޮންނަ ޝަރަފު ދެމެެހެއްޓުމަކީ ވެސް އެ ނިންމެވުމުގެ ބޭނުމެއްކަމަށް ފިރުޒުލް ވިދާޅުވިއެވެ.
- އިތުރަށް ކިޔާލަން: ޑރ. މުއިއްޒު ދިވެހި ދިދަޔަށް؛ ތިޔަ އައުދާނަ ދިވެހި ދިދަޔަށް އިރު އޮއްސުން ނިމުނީ...!
ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި ވެސް ވަޒީރުންގެ ގެކޮޅުތަކުގައި ދިވެހި ދިދަ ނަގަ އެެވެ. ދައުލަތުގެ އޮފީސްތަކުގައި ދިވެހި ދިދަ މީގެ ކުރިން ނަގަމުން އައީ ކޮންމެ ރަސްމީ ދުވަހެއްގެ ހެނދުނު 6:00 އިން ފެށިގެން އިރުއޮއްސި 6:00 އަށެވެ.
