ރިޔާސީ އިންތިހާބުގެ ނާކާމިޔާބީއަށް ފަހު އެމްޑީޕީން ފާސްކުރި ގަރާރުގައި ބުނީ، އިދިކޮޅު ފަރާތްތަކުން ނުވަތަ މިހާރު ސަރުކާރު ހިންގާ ޕާޓީތަކުން ނިމުނު ރިޔާސީ އިންތިހާބުގެ ދެ ބުރުގައި ދެއްކި ވާހަކަތަކާ ގުޅޭ އިންކުއަރީ މަޖިލީހަށް ހުށަހަޅައިގެން ބެލުމަށެވެ.

އެ ގަރާރު ހުށަހެޅުއްވީ އެ ޕާޓީގެ ޗެއާޕާސަންގެ ނައިބު އިބްރާހީމް ވަހީދު (އިބުރޭ) އެވެ. އެ ގަރާރުގައި ބުނެފައި ވަނީ އެމްޑީޕީއަކީ ދިވެހި ރައްޔިތުންނަށް ލިބެން ޖެހޭ އަސާސީ ހައްގުތަކާއި އަދި ޑިމޮކްރަސީ ރާއްޖެ ގެނައުމުގެ "އާރުކާޓީ" ކަމަށެވެ. އެޕާޓީގެ އަބަދުވެސް އުއްމީދަކީ އަދި އަމާޒަކީ އެމަގުން ކަންކަން ކުރިޔަށް ގެންދިއުން ކަމަށް އެ ގަރާރުގައިވެ އެވެ.

އެމްޑީޕީގެ މެންބަރުން އިތުރުކުރަން މަސައްކަތް ކުރުމާއި ޑިމޮކްރެޓިކް އުސޫލުތަކުގެ ތެރެއިން ވެރިކަމުގެ ނިޒާމު ބައްޓަން ކުރުމަށް ބާރު އެޅުމަށާއި އަނިޔާވެރިކަން ހުއްޓުވަން އެމްޑީޕީ ދެމިއޮތުމަށް ވެސް ރޭގެ ބައްދަލުވުމުގައި ބައިވެރިވި ހުރިހާ މެންބަރުންގެ އިއްތިފާގުން ފާސްކުރި ގަރާރުގައި ވަނީ ނިންމައިފަ އެވެ.

ރޭގެ އެމްޑީޕީގެ ގައުމީ މަޖިލީހުގެ ބައްދަލުވުމުގައި ވަނީ އެ ޕާޓީގެ ވަގުތީ ރައީސަކަށް މިދިޔަ ހުކުރު ދުވަހު ރިޔާސީ ދައުރު ފުރިހަމަކުރި ރައީސް އިބްރާހިމް މުހައްމަދު ސޯލިހު އައްޔަންކުރަން ވެސް ފާސްކޮށްފަ އެވެ. އެ ގޮތަށް ފާސްވީ 47 މެންބަރުންގެ ވޯޓުންނެވެ.

އުކުޅަހުގައި ރޭ ކުރިއަށްދިޔަ އެމްޑީޕީގެ ގައުމީ މަޖިލީހުގެ ބައްދަލުވުމުގެ ރިޔާސަތު، އެ ޕާޓީގެ ޗެއާޕާސަން ފައްޔާޒާއި ޑެޕިއުޓީ ޗެއާ އަހުމަދު އަބްދުﷲ (ކ) މިއަދު ބަލަހައްޓަވަނީ.-- ފޮޓޯ: އެމްޑީޕީ

ނިމުނު ރިޔާސީ އިންތިހާބުގެ ދެ ވަނަ ބުރުގައި ރާއްޖޭގެ އާ ރައީސްގެ މަގާމަށް ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ހޮވީ 126،842 ވޯޓާ އެކު އެވެ. އެއީ 53 ޕަސެންޓެވެ. ރިޔާސީ ދެ ވަނަ ދައުރެއް ލިބިވަޑައިނުގެން ބޮޑު ނާކާމިޔާބީއަކާ ކުރިމަތިލައްވަން ޖެހިވަޑައިގެންނެވި ރައީސް އިބްރާހިމް މުހައްމަދު ސޯލިހަށް ހޯއްދެވުނީ 46 ޕަސެންޓެވެ. އެއީ 108،500 ވޯޓެވެ.

މި އަހަރު ސެޕްޓެމްބަރު މަހުގެ ނުވަ ވަނަ ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުން ވެސް ރައީސް އިބްރާހިމް މުހައްމަދު ސޯލިހުގެ މައްޗަށް ކުރި ހޯއްދެވީ މުއިއްޒެވެ. ފުރަތަމަ ބުރުގައި މުއިއްޒު 101،635 ވޯޓު ހޯއްދެވިއިރު، ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 86،161 ވޯޓެވެ. އެއީ 15،474 ވޯޓުގެ ފަރަގެވެ.

މުއިއްޒު ހޯއްދެވި ކާމިޔާބީ އަށް މަރުހަބާ ވިދާޅުވެ، ރައީސް ސޯލިހް ސަރުކާރުގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ކަން ވެސް ކުރައްވާ ފައްޔާޒު އެއިރު ވިދާޅުވީ އެމްޑީޕީން ދެން މަސައްކަތް ކުރާނީ ޒިންމާދާރުކަމާ އެކު ޕީޕީއެމް/ޕީއެންސީގެ ސަރުކާރު ޒިންމާދާރުކޮށް، ޖަވާބުދާރީ ކުރުވުމަށެވެ.

ރާއްޖޭގައި ޑިމޮކްރެޓިކް އުސޫލުތައް ހަރުދަނާކުރަން ވެސް ދެމިތިބޭނެ ކަމަށް "އެކްސް" ގައި ކުރެއްވި ޕޯސްޓުގައި އޭނާ ވިދާޅުވި އެވެ.