އެ ހޮސްޕިޓަލުން މިއަދު ބޭއްވި ނިއުސް ކޮންފަރެންސްގައި، ފާޓިލިޓީ ސްޕެޝަލިސްޓް، ޑރ. ޒާކިޔާ އަހުމަދު ވިދާޅުވީ މިދިޔަ މެއި މަހު ފާޓިލިޓީ ސެންޓަރު ހުޅުވުމަށް ފަހު، އައިވީއެފް ހަދާނެ މީހުން ކަނޑައަޅައި އެ ފަރުވާތައް ފެށީ މިދިޔަ ޖުލައި މަހު ކަމަށެވެ.

އަންނަ އަހަރުން ފެށިގެން ކޮންމެ ދުވަހަކު ވެސް އެ ޕްރޮސީޖާ ކުރިއަށް ގެންދެވޭނެކަން ޒާކިޔާ ފާހަގަކުރެއްވި އެވެ.

ޓްރީޓޮޕްގެ ތިންވަނަ ފަންގިފިލާ އައިވީއެފްގެ ހިދުމަތް ދިނުމަށް ހާއްސަކޮށްފައިވާއިރު، އެ ފާޓިލިޓީ ސެންޓަރު ގާއިމްކުރަން މިލިއަނެއްހާ ޑޮލަރު ހަރަދުކުރަން ޖެހުނު ކަމަށް އެ ހޮސްޕިޓަލުގެ މެނޭޖިން ޑިރެކްޓަރު އަހުމަދު ނަޒީރު މީގެ ކުރިން ބުންޏެވެ. މި ތަން ގާއިމްކޮށްފައިވަނީ އިންޑިއާގެ ސައިމާ ސެންޓަރާ ގުޅިގެންނެވެ. ފާޓިލިޓީ ސެންޓަރުން އައިވީއެފް، އައިޔޫއައި އަދި އައިސީއެސްއައިގެ ޚިދުމަތް ދޭނެއެވެ.

އެންމެ ފުރަތަމަ ހިދުމަތް ފަށިއިރު ވެސް ބޮޑު ތަރުހީބެއް ލިބިފައިވާއިރު، ފާޓިލިޓީ ކްލިނިކަށް ދެއްކުމަށް އެޕޮއިންޓްމެންޓު ހެއްދުމަށް ވެސް ޓްރީ ޓޮޕުން ވަނީ ފަސޭހަ ގޮތްތަކެއް ހަމަޖައްސައިދީފަ އެވެ.

ރާއްޖޭގައި އަލަށް ހުޅުވި ފާޓިލިޓީ ސެންޓަރުގައި މި ވަގުތު 160 މީހުން ރަޖިސްޓްރީކޮށްފައި އެބަތިއްބެވެ.

އައިވީއެފް ފަރުވާއަށް ހާއްސަ، ޓްރީ ޓޮޕްގައިި މަސައްކަތް ކުރައްވާ ޑރ. އަނީތާ ގޯރު ވިދާޅުވީ، މަސައްކަތް ކުރަނީ ޓްރީ ޓޮޕުން ދޭ އައިވީއެފް ހިދުމަތަކީ ދުނިޔޭގެ ފެންވަރުގެ ހިދުމަތަކަށް ހެދުމަށް ކަމަށެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ޓްރީ ޓޮޕްގެ ސީއޯއޯ އާދިލް މޫސާ ވިދާޅުވީ އެ ހޮސްޕިޓަލުން ދޭ އައިވީއެފް ފަރުވާގެ މުޅި ޕްރޮސީޖާ ކުރިއަށް ގެންދަނީ ހޮސްޕިޓަލުގެ އެތެރޭގައި ކަމަށެވެ.

އައިވީއެފް ފަރުވާ ހޯދަން މިހާތަނަށް މީހުން ދިޔައީ ރާއްޖެއިން ބޭރަށެވެ. އެ ފަރުވާއަށް ގިނަ ދުވަސްތަކެއް ވަންދެން ރާއްޖެއިން ބޭރުގައި މަޑުކުރަން ޖެހޭތީ އަތުން ވެސް ބޮޑު ހަރަދެއް ހިނގަ އެވެ. ނަމަވެސް، ޓްރީޓޮޕް ހޮސްޕިޓަލުގައި އައިވީއެފްގެ ބުރަކަށް ކަނޑައަޅާފައިވަނީ 46000ރ އެވެ.

ސަރުކާރުން އިއުލާނުކޮށްފައިވާހެން އާސަންދަ މެދުވެރިކޮށް އައިވީއެފް ފަރުވާ ލިބެން ފެށުމުން މި ފަރުވާ ހޯދާ އަންނަ މީހުންގެ އަދަދު އިތުރުވާނެ ކަމަށް ޓްރީޓޮޕް އިން ލަފާކުރެ އެވެ.

އައިވީއެފް ފަރުވާ އާސަންދައިގައި ހިމެނުމަކީ ރައީސް މުހައްމަދު ޑރ. މުއިއްޒުގެ 100 ދުވަހުގެ ވައުދުތަކުގެ ތެރޭގައި ހިމެނޭ ކަމެކެވެ.