ހައިކޯޓުން މި ގޮތަށް ކަނޑައެޅީ، އެ މައްސަލަ ދުސްތޫރީ މައްސަލައެއްގެ ގޮތުގައި ހައިކޯޓަށް ހުށަހެޅުމުންނެވެ. މައްސަލަ ހައިކޯޓުން މިއަދު ނިންމީ، ފަސް ފަނޑިޔާރުންގެ މައްޗަށް އެކުލެވޭ ބެންޗަކުންނެވެ.
ހައިކޯޓުން މިއަދު ކުރި ހުކުމުގައި ބުނެފައިވަނީ މުވައްޒަފުން ހަޅުތާލު ކުރުމުގެ ހައްގު ހަނިކޮށް ހަދާފައިވާ ގަވާއިދަކީ ގާނޫނުއަސާސީއާ ހިލާފު ގަވާއިދެއް ކަމަށާއި ނަމަވެސް ހަ މަސް ދުވަހަށް އެ ގަވާއިދަށް އަމަލު ކުރެވޭނެ ކަމަށެވެ. މީގެ 12 އަހަރު ކުރިން ހަދާފައިވާ، ވަޒީފާ ދޭ ފަރާތާއި ވަޒީފާ އަދާކުރާ ފަރާތްތަކާ ދެމެދު އުފެދޭ ދެބަސްވުންތައް ހައްލުކުރުމުގެ ގަވާއިދު އޮންނަ ގޮތުން ހަޅުތާލު ކުރެވޭނީ ސުލްހަވެރިކަމާ އެކު މަޝްވަރާ ކުރުމަށް ފަހު އަދި ލޭބާ ރިލޭޝަންސް އޮތޯރިޓީ މެދުވެރިކޮށްގެން ވެސް ހައްލެއް ނުލިބިއްޖެ ނަމަ އެވެ.
އެ ގަވާއިދު ބާތިލްކުރަން ހައި ކޯޓަށް ދުސްތޫރީ މައްސަލައެއް ހުށަހެޅީ މޯލްޑިވްސް ޓްރޭޑް ޔޫނިއަން ކޮންގްރެސް އާއި މޯލްޑިވްސް ހެލްތު ޕްރޮފެޝަނަލްސް ޔޫނިއަންގެ ފަރާތުންނެވެ. ހައި ކޯޓުން މިއަދު ކުރި ހުކުމުގައިވަނީ ގާނޫނު އަސާސީން ލިބިދޭ އަސާސީ ހައްގެއް ހަނި ކުރެވޭނީ ގާނޫނެއްގެ ދަށުން ކަމަށް ގާނޫނު އަސާސީގައި ބުނެފައިވާތީ، ގާނޫނަށް ވުރެ ފުޅާކޮށް ގަވާއިދެއްގެ ދަށުން އަސާސީ ހައްގުތައް ހަނި ކުރުމަކީ ގާނޫނު އަސާސީ ހިލާފް ކަމެއް ކަމަށެވެ. އަދި ހަޅުތާލު ކުރުމަކީ އަސާސީ ހައްގެއް ކަމަށް ވާއިރު، އެ ގަވާއިދުގެ ދަށުން އެ ހައްގު ހަނިކޮށްފައި އޮތީ ވަޒީފާއާބެހޭ ގާނޫނުގައި އެފަދަ ހަނި ކުރުމެއް އޮވެގެން ނޫން ކަމަށް ހުކުމުގައިވެ އެވެ.
ހުކުމުގައިވަނީ އިންޑަސްޓްރިއަލް ރިލޭޝަންސްގެ ބިލް ފާސްކުރެވެންދެން އެ ގަވާއިދަށް އަމަލު ކުރެވޭނެ ކަމަށް ނިންމައިދޭން ދައުލަތުން އެދިފައިވާއިރު، އެފަދަ އަމުރުތައް ނެރުމުގެ ބާރު ދުސްތޫރީ މައްސަލަތަކުގެ ތެރެއިން ނެރެވިދާނެ ކަމަށެވެ.
