މަސްޖިދުލް ސުލްތާން މުހައްމަދު ތަކުރުފާނުލް އައުޒަމްގައި މާދަމާ އިމާމުވެ ހުކުރު ކުރެއްވުމަށް ހަމަޖެހިފައި ވަނީ އަލްއުސްތާޒް މުހައްމަދު ފިރުޒުލް އަބްދުﷲ ހަލީލު ކަމަށް ލިޔެފައިވާ ހަބަރަކާ އެކު އެކްސްގައި މިރޭ ކުރެއްވި ޕޯސްޓެއްގައި އިސްލާމިކް މިނިސްޓަރު ޝަހީމް ވިދާޅުވީ ފިރުޒުލްއަކީ މިސްރުގެ އަލްއަޒްހަރު ޔުނިވަސިޓީން ތައުލީމު ހާސިލުކުރައްވައިގެން ހުންނެވި އިލްމުވެރި ޒުވާނެއް ކަމަށެވެ.
އިސްލާމިކް މިނިސްޓްރީން މިރޭ އެކްސްގައި ކުރި ޕޯސްޓެއްގައި ބުނީ މާދަމާ އިސްލާމީ މަރުކަޒުގައި އިމާމުވެ ހުކުރު ކުރައްވާނީ ރައީސް އޮފީހުގެ އަންޑަ ސެކްރެޓެރީ ފޮ ޕަބްލިކް ޕޮލިސީގެ މަގާމު އަދާކުރައްވަމުން އަންނަ ފިރުޒުލް ކަމަށެވެ. މާދަމާގެ ހުކުރު ހުތުބާގެ މައުލޫއަކީ އިންސާނާގެ ހަޔާތުގައި ސައްހަ އަގީދާގެ މުހިންމު ކަމެވެ.
އިސްލާމީ މަރުކަޒުގައި މާދަމާ އިމާމުވެ ހުކުރު ކުރައްވާނީ ފިރުޒުލްކަން އިސްލާމިކް މިނިސްޓްރީން ހާމަކުރުމާ އެކު ގިނަ ބަޔަކު އަންނަނީ އޭނާއަށް މަރުހަބާ ކިޔަމުންނެވެ.
އިންތިގާލީ މަރުހަލާގައި އިންތިހާބީ ރައީސްގެ އޮފީހުގެ ތަރުޖަމާނު މަގާމު އަދާކުރެއްވި އުމުރުން 29 އަހަރުގެ ދ. ކުޑަހުވަދޫއަށް ނިސްބަތްވާ މި ޒުވާނާ އާންމުންގެ މެދުގައި މަގުބޫލުވެފައި ވަނީ ވާހަކަ ދެއްކެވުމުގައި އޭނާ ގެންގުޅުއްވާ ފަށުވި އިބާރާތްތަކާއި ބޭނުންކުރައްވާ ސާދާ ބަސްމަގާ ގުޅިގެންނެވެ.
