އެމަނިކުފާނު މިހެން ވިދާޅުވެފައި ވަނީ "ސާކް ޗާޓަ ޑޭ" ގެ މުނާސަބަތުގައި ފޮނުއްވި ތަހުނިޔާގެ މެސެޖުގަ އެވެ.
ރައީސް މުއިއްޒުގެ މެސެޖުގައި ވަނީ، ސާކްއަށް 39 އަހަރު ފުރުމުގެ މުނާސަބަތުގައި ސާކްގެ ސެކްރެޓަރީ ޖެނެރަލަށާއި ސާކްގެ ސެކްރެޓޭރިއެޓަށާއި ސާކް އާ ގުޅިފައިވާ ހުރިހާ މުއައްސަސާތަކަށާއި ސާކްގެ މެންބަރު ގައުމުތަކުގެ ރައްޔިތުންނަށް، ދުވަހުގެ ހެޔޮއެދުމާއި ތަހުނިޔާ އަރިސްކުރައްވާފަ އެވެ. "ސާކް ޗާޓަ ޑޭ" ގެ ގޮތުގައި ފާހަގަކުރަނީ ކޮންމެ އަހަރެއްގެވެސް ޑިސެމްބަރު މަހުގެ އަށް ވަނަ ދުވަހެވެ.
ރައީސް މުއިއްޒުގެ މެސެޖުގައި، ދެކުނު އޭޝިއާގެ ސަރަހައްދީ ގުޅުންތަކާ ގުޅޭ ހަމަތަކާއި އުސޫލުތައް އަދި ސަރަހައްދުގެ ހަމަޖެހުމާއި ސުލްހަމަސަލަސްކަން ކުރިއެރުވުމަށް މަސައްކަތްކުރުމުގެ މުހިންމުކަން ފާހަގަކުރައްވާފައިވެ އެވެ. އަދި އެމަނިކުފާނު ވަނީ ސަރަހައްދީ ގޮންޖެހުންތަކާ ކުރިމަތިލައި، އެއް އަމާޒަކަށް ދަތުރުކުރުމުގައި ސާކްގެ މުހިންމު ދައުރު ފާހަގަކުރައްވާފަ އެވެ.
ދެކުނު އޭޝިއާ ސަރަހައްދުގައި ވިލުންތެރިކަން އިތުރުކުރުމަށް ގައުމުތަކުގެ މެދުގައި ގުޅުން ބަދަހިކޮށް، ސާކް ޗާޓަރުގެ އަސާސްތައް ނެގެހެއްޓުމަށް އާ ބާރެއް ލައިގެން މަސައްކަތް ކުރުމަށް ރައީސް މުއިއްޒު ވަނީ އެދިވަޑައިގެންފަ އެވެ.
