ފުލުހުންގެ ބެލުމުގެ ދަށަށް ގެންދާ ޑްރަގްސްގެ ސްޓޮކް ބެލެހެއްޓުމުގެ މަސައްކަތްކުރި ހަސަން ޝުޖާއު އާއި އޭނާގެ ލޯބިވެރިޔާ މަރިޔަމް ސަފާ، ހައްޔަރުކުރީ، މިދިޔަ އަހަރުގެ ނޮވެމްބަރު މަހުގެ 10 ވަނަ ދުވަހުގެ ރޭ ހުޅުމާލޭގެ އެޕާޓްމަންޓަކުންނެވެ. އެ މައްސަލައިގައި، އޭނާ ފުލުހުންގެ ވަޒީފާއިން ވަކިނުކޮށް، މަގާމް ދަށް ކުރަން ފުލުހުންގެ އެޕީލް ކޮމިޓީންވަނީ ނިންމާފައި ކަމަށްވަނީ މައުލޫމާތު ލިބިފައެވެ.
ފުލުހުންގެ ބެލުމުގެ ދަށަށް ގެންދާ ޑްރަގްސްގެ ސްޓޮކް ބެލެހެއްޓުމުގެ މަސައްކަތްކުރި ހަސަން ޝުޖާއު މިދިޔަ އަހަރުގެ ނޮވެމްބަރު މަހުގެ 10 ވަނަ ދުވަހުގެ ރޭ ހުޅުމާލޭން ހައްޔަރު ކުރުމަށް ފަހު އޭނާގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ފުލުހުން އެދިގެން އޭނާގެ ބަންދު މަޖިލިސް ސިއްރުކުރީ އެވެ. އެހެންވެ، ބަންދާ މެދު ނިންމި ގޮތެއް އަދި އޭނާ އަށް ކުރާ ތުހުމަތެއް ސާފެއް ނުވެ އެވެ.
މައުލޫމާތު ލިބިފައިވާ ގޮތުގައި އެ މައްސަލައިގައި ފަހުން ޝުޖާއު ސަސްޕެންޑު ކުރި އެވެ. އެކަމަކު، ސަސްޕެންޝަންގެ މުއްދަތު ހަމަވުމުން، ވަޒީފާ އަށް ނުކުންނަން ފެށިއަސް، ޝުޖާއު އޭރު ހުރީ ޒިންމާތަކުން އެކަހެރި ކޮށްފަ އެވެ. މައްސަލަ ބެލުމަށް ފަހު ފުލުހުންގެ ޑިސިޕްލިނަރީ ބޯޑުން ވަނީ އޭނާ ވަޒީފާ އިން ވަކިކުރަން ނިންމައިފަ އެވެ.
މި މައްސަލަ ފެންމަތިވިއިރު، ޝުޖާއު ހުރީ ސީނިއާ ސާޖެންޓަކަށެވެ. އޭނާ ޑީމޯޓުކުރީ ސާޖަންޓް ގްރޭޑު 3ގެ ލެވެލްއަށެވެ.
