ރޭ ބާސެލޯނާ އަތުން ޖިރޯނާ މޮޅުވީ ހަތަރު ލަނޑު ދެ ލަނޑުންނެވެ. މިއީ ބާސެލޯނާ އަތުން ލީގުގައި ޖިރޯނާ މޮޅުވީ ފުރަތަމަ މެޗެވެ.
ކުރިން ދެވަނައިގައި އޮތް ޖިރޯނާ، ރޭ ހޯދި މޮޅާ އެކު އެ ޓީމު ވަނީ އެއްވަނައިގައި ދެ ޕޮއިންޓްގެ ލީޑެއް ހޯދާފައެވެ. މިހާރު، ދެވަނައިގައި އޮތީ ރެއާލް މެޑްރިޑެވެ.
ބާސާ ވެސް ނިސްބަތްވާ ކެޓަލޯނިއާގެ ޖިރޯނޯ އިން، މެޗުގައި އެންމެ ފުރަތަމަ ލީޑް ނެގީ ޔޫކްރޭންގެ ފޯވާޑް އާޓެމް ޑޮބީކް މެޗުގެ 12 ވަނަ މިނެޓްގައި ޖެހި ލަނޑުންނެވެ. ބާސާގެ ރޮބަޓް ލެވަންޑޯސްކީ އެ ޓީމަށް ނަތީޖާ ހަމަހަމަކޮށްދިނެވެ.
ފުރަތަމަ ހާފު ނިމުމުގެ ކުރިން ޖިރޯނާ އިން އަނެއްކާ ވެސް ލީޑް ނެގީ ކުރިން ރެއާލްގެ ޔޫތު ޓީމަށް ކުޅުނު މިގުއެލް ގުޓިއަރެޒް ޖިރޯނާގެ ލަނޑުންނެވެ. ނަތީޖާ އަށް ބަދަލު އައީ އަނެއްކާ ވެސް ދެވަނަ ހާފުގެ ފަހުކޮޅުގައި ވެލަރީ ފެނާންޑޭޒް ޖިރޯނާ އަށް ލީޑް ފުޅާކޮށްދިނުމުންނެވެ. ބާސާގެ ދެވަނަ ލަނޑު ޖެހީ ގުންޑޮގާން އތުރު ވަގުތުގެ ދެވަނަ މިނެޓްގަ އެވެ. އޭގެ ތިން މިނެޓް ފަހުން ޖިރޯނާގެ ހަތަރުވަނަ ލަނޑު ޖެހީ ކްރިސްތިއަން ސްޓުއާނީ އެވެ.
